Трусаў: Чым больш лістоў атрымае чыноўнік, тым хутчэй будзе вынік

24/08/2011 - 11:30

Масавая атака лістамі чыноўнікаў мусіць адбыцца 25 жніўня ў Глыбоцкім раёне. Яна арганізаваная праз сацыяльныя сеткі. Удзельнікі акцыі збіраюцца патрабаваць патлумачыць прычыны пераводу шыльдаў з назвамі населеных пунктаў у Глыбоцкім раёне з беларускай мовы на рускую. Еўрарадыё паразмаўляла пра эфектыўнасць такой акцыі па абароне беларушчыны са старшынём ТБМ Алегам Трусавым.

Еўрарадыё: Наколькі такія метады як "масавае закідванне чыноўнікаў лістамі" дзейсныя?

Алег Трусаў: Гэтыя метады надзвычай эфектыўныя. Чым раней пачнецца масавае накіроўванне лістоў, тым хутчэй будзе вынік. Але адзінае, што грамадзяне павінны іх правільна пісаць. Кожны чалавек піша гэты ліст на паперы, указвае усе свае дадзеныя — дакладны свой адрас з паштовым індэксам.

Еўрарадыё: Пераклад шыльдаў з беларускай мовы на рускую — гэта праблема толькі Глыбоцкага і суседніх раёнаў ці гэта масава адбываецца па ўсёй краіне?

Алег Трусаў: Калі дарога галоўная, важная, то, вядома, акрамя беларускай мовы ўжываецца і руская, і даволі часта англійская мова. Гэта еўрапейская практыка і нічога тут страшнага няма. Іншая справа, што галоўная шыльда, першая, павінна быць па-беларуску — гэта візітная картка нашай краіны, а побач, іншым колерам, крыху меншымі літарамі можна змяшчаць надпісы і на іншых мовах.

Еўрарадыё: Наколькі за апошняя 20 гадоў мяняліся адносіны чыноўнікаў да беларушчыны?

Алег Трусаў: На пачатку незалежнасці, калі адзінай дзяржаўнай мовай была беларуская, чыноўнікі павінны былі з гэтым лічыцца. Пасля "славутага" рэферэндуму [1995 года], які абвясціў так званую "роўнасць", большасць чыноўнікаў вырашыла, што беларуская мова памерла і ёй карыстацца не трэба. Сітуацыя пачала мяняцца пасля перапісу [1999 года], падчас якога ўдалося атрымаць лічбы, якія сведчылі аб тым, што беларуская мова ў Беларусі не памерла і актыўных носьбітаў тады, якія сказалі, якія штодня гавораць па-беларуску было аж 37%, а большасць грамадзян назвалі беларускую мову роднай.

Прайшло 10 гадоў, русіфікацыя дала свой плён — і зараз лічбы сталі меншыя. Тым не менш, падчас апошняга перапісу паўтара мільёны беларусаў засведчылі, што штодня размаўляюць па-беларуску. Паўтара мільёны — гэта насельніцтва Эстоніі. Вядома, тых, хто назваў роднай мовай беларускую, больш за палову. Адносіны чынавенства змяніліся прынамсі таму, што но само змянілася. Зараз да ўдады прыходзяць маладыя хлопцы, кабеты, якія ў большасці беларускую мову і любяць, і ведаюць, і шануюць. У кожным горадзе па-рознаму.