Ты не адзін: дзе беларусу знайсці падтрымку і дапамогу за мяжой

Сотні тысяч беларусаў вымушаныя былі з’ехаць з краіны ў выніку рэпрэсій, якія разгарнуў супраць уласнага народа лукашэнкаўскі рэжым. Эміграцыя ў любым выпадку рэч даволі складаная, асабліва ва ўмовах, калі ты да яе не імкнуўся. Адпаведна, шэраг людзей, якія не здолелі знайсці сабе месца ў іншай краіне ці не адаптаваліся, паспрабавалі вярнуцца на радзіму. І 52 такіх вяртанца толькі летась практычна адразу паехалі за краты. Радзіма, насуперак абяцанням Лукашэнкі, не гатовая “перагарнуць старонку”. Нават тады, калі абяцае гэта зрабіць.

Што найперш становіцца аргументам на карысць спробы вяртання? Ці сапраўды ў эміграцыі варта разлічваць толькі на сябе і свае сілы? Якія беларускія ініцыятывы і структуры існуюць у Польшы, і ці ёсць падтрымка з боку польскіх улад? На гэтыя ды іншыя пытанні адказвае кіраўнік Беларускага моладзевага хаба (Варшава), прадстаўнік Народнай амбасады Беларусі ў Польшчы Алесь Лапко.