У аўтааварыі пад Полацкам загінуў чалавек і восем пацярпелі (фота)
Здарэнне адбылося зранку ў нядзелю, 18 жніўня каля вёскі Гараны.
Як паведамляе прэс-служба Міністэрства па надзвычайных сітуацыях, адбылося лабавое сутыкненне легкавога аўтамабіля "Фольксваген-Шаран" і рэйсавага аўтобуса "МАЗ".
Кіроўца аўтамабіля памёр на месцы аўтааварыі. Выратавальнікі даставалі кіроўцу пры дапамозе гідраўлічнага аварыйна-выратавальнага прыстасавання. Пацярпела і пасажырка "Фольксвагена", медыкі даставілі яе ў лякарню.
У аўтобусе было 20 пасажыраў. Сем чалавек пацярпелі, чатыры з іх шпіталізаваныя, у тым ліку адно дзіця.
Фота — mchs.gov.by
