У Беларусі — больш за 5 тысяч пацверджаных выпадкаў COVID-19 | Навіны Беларусі

Мінздароўя другі дзень запар хавае ад беларусаў частку статыстыкі па распаўсюдзе каранавіруснай інфекцыі ў краіне. Не паведамляецца дакладная колькасць пацверджаных выпадкаў COVID-19 у Беларусі. Але 19 красавіка можна дакладна сказаць, што іх колькасць перавысіла 5 тысяч.

17 красавіка — апошні дзень, калі чыноўнікі ад здароўя паведамілі колькасць пацверджаных выпадкаў COVID-19 — тады іх было 4779. За апошнія 24 гадзіны ў лякарні трапілі 292 новыя пацыенты з каранавіруснай інфекцыяй, бо паведамляецца, што выпісаныя за суткі 36 пацыентаў, а колькасць занятых ложкаў у стацыянарах пры гэтым павялічылася на 256. Такім чынам, у Беларусі на 19 красавіка як мінімум 5071 чалавек з пацверджаным COVID-19.

Якую статыстыку Мінздароўя ўсё ж не хавае?

Афіцыйна паведамляецца, што за апошнія суткі памерлі 2 пацыенты з пацверджаным COVID-19 (усяго ахвяраў віруса цяпер 47), а выздаравелі 34 чалавекі (усяго тых, хто паправіўся, цяпер 494).

За суткі ў Беларусі зроблена 5522 тэсты на каранавірусную інфекцыю. Усяго з 23 студзеня іх зроблена 98 тысяч 231. Апрацоўкай тэстаў займаюцца ў 25 лабараторыях.

Дадзеныя па 18 і 19 красавіка змадэляваныя зыходзячы з колькасці зробленых за суткі тэстаў і адсотка станоўчых тэстаў, які назіраўся раней.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.