У ЕС не змаглі дамовіцца пра столь коштаў на расійскую нафту
Нафтавыя помпы ў расійскім Татарстане / РИА Новости
Краіны Еўрасаюза не змаглі дамовіцца пра столь коштаў на расійскую нафту, піша Politico. Абмеркаванне ішло з раніцы да позняй ночы, але прыйсці да кансенсусу так і не ўдалося. "Пытанне — у цане", — сказаў адзін з дыпламатаў пасля перамоваў.
Большасць краін ЕС пагадзіліся на столь ў 65-70$ за бараль. Гэта была прапанова Еўракамісіі. Супраць выступіла Польшча. Яна патрабуе знізіць кошт да 30$. Дыпламаты, з якімі пагутарылі журналісты выдання, кажуць, што спроба Варшавы звязаць абмежаванне коштаў на нафту з дзевятым пакетам санкцый супраць Расіі можа прывесці да таго, што прыняцце абодвух рашэнняў будуць адкладзена.
Нагадаем, Еўракамісія ў цяперашні момант рыхтуе дзявяты пакет санкцый. Ён накіраваны ў асноўным супраць расійскіх чыноўнікаў і прыхільнікаў рэжыму Уладзіміра Пуціна.
Politico таксама адзначае, што напярэдадні — на фоне абмеркавання столі коштаў — кошты на нафту знізіліся. Ф'ючарсы на Brent таргаваліся на ўзроўні 84,69 даляра за бараль.
