У Гомелі гарэла будоўля гіпермаркета (фота, відэа)
Здарэнне адбылося ўдзень 16 траўня на вуліцы Барыкіна.
На тэрыторыі будоўлі адкрытым агнём гарэў пенапласт на плошчы 500 квадратных метраў. У каментары Еўрарадыё прэс-сакратар гомельскіх выратавальнікаў Руслан Габрылёў адзначыў, што пажар быў не столькі вялікім, колькі відовішчным:
Габрылёў: "Адбылося ўзгаранне дахавага матэрыялу і ўцяпляльніка — пенапалістырольных плітаў, у прастамоўі — пенапласту. Пры яго гарэнні выдзяляецца вялікая колькасць чорнага дыму. Таму слуп дыму было відаць практычна з любога пункту Гомеля".
На месцы пажару працавала каля 10 аўтацыстэрнаў. Аднаго чалавека выратавальнікі знялі з даху. Пацярпелых на пажары няма.
На месцы здарэння працуе камісія, якая высвятляе прычыны пажару.
Фота — odsgomel.org
