У Мінадукацыі распісалі, што павінен умець выхаванец садка да сямі гадоў

Міністэрства адукацыі Беларусі зацвердзіла новы адукацыйны стандарт для дашкольнікаў, піша БЕЛТА. Гэтыя патрабаванні абавязковыя для ўсіх дзіцячых садкоў краіны. Дакумент, сярод іншага, вызначае напрамкі выхавання. Іх шмат: у тым ліку ідэалагічнае, грамадзянскае, патрыятычнае, духоўна-маральнае і эстэтычнае. Але адначасова прапануецца надаваць увагу і фізкультуры, і фармаванню навыкаў здаровага ладу жыцця, працоўнаму выхаванню.

Дакумент таксама апісвае, што дашкольнік павінен умець да сямі гадоў:

- пераказваць кароткія казкі і апавяданні;
- называць словы беларускай і рускай моваў, якія супадаюць або падобныя па вымаўленні, але маюць рознае лексічнае значэнне;
- называць сезонныя змены ў прыродзе, адзенні, працы і гульнях дзяцей;
- заўважаць і называць маскіравальную афарбоўку жывёл і суадносіць яе з тымі аб'ектамі прыроды, пад якія яны маскіруюцца;
- называць правілы бяспечных паводзін з раслінамі і жывёламі ў лесе, на лузе, вадаёме;
- рашаць простыя арыфметычныя задачы на складанне і адыманне;
- адрозніваць і называць геаметрычныя фігуры, лічыць да 20;
- адрозніваць рэальны і ўяўны свет, а таксама рэальныя наступствы дзеянняў, учынкаў ад уяўных;
- выразна чытаць вершы.

Да заканчэння дзіцячага садка дзіця таксама мусіць умець назваць свой адрас і нумары тэлефонаў, а таксама ведаць, як паводзіць сябе ў патэнцыйна небяспечных сітуацыях.