У Мінску пачаўся суд над блогеркай Вольгай Такарчук
У Мінску пачаўся суд над Youtube-блогеркай Вольгай Такарчук. Яе абвінавачваюць па трох артыкулах Крымінальнага кодэкса: у "паклёпе", "абразе суддзі" і "актыўным удзеле ў дзеяннях, што груба парушаюць грамадскі парадак". Справу разглядае суд Заводскага раёна.
Сцвярджаецца, што 30 жніўня 2020-га Такарчук актыўна ўдзельнічала ў "несанкцыянаваным масавым мерапрыемстве" ў сталіцы, "у блакаванні шляхоў транспартных камунікацый". Следства мае даныя пра ўдзел і ў акцыях 20 верасня і 1 лістапада мінулага года. Тады ў іх удзельнічалі дзясяткі тысяч чалавек.
Таксама да Вольгі Такарчук маюць прэтэнзіі з-за відэароліка. Нібыта ў ім былі непраўдзівыя звесткі пра сацыяльнага педагога з Брэсцкай вобласці і абразы на адрас суддзі Першамайскага суда Мінска.
Такарчук знаходзіцца за кратамі з траўня 2021-га. Яна аб'яўляла галадоўку ў карцары. Вольга Такарчук прызнаная палітзняволенай. У яе двое дзяцей (ва ўзросце трох і сямі гадоў).
