У Паўднёвай Караліне ўпершыню за апошнія 13 гадоў казнілі чалавека

Смяротны прысуд упершыню за апошнія 13 гадоў быў прыведзены ў выкананне ў Паўднёвай Караліне. Пра гэта піша мясцовае выданне Post and Courier.

Фрэдзі Юджын Оўэнс быў прысуджаны да смяротнага пакарання пасля таго, як забіў прадавачку крамы падчас рабавання ў 1997 годзе. У 41-гадовай жанчыны засталіся трое дзяцей. На момант забойства злачынцу было 19 гадоў.

Асуджаны падаў прашэнне аб памілаванні губернатару штата, але той адмовіў у прашэнні.

Мужчына быў пакараны смерцю шляхам смяротнай ін'екцыі. У яго таксама быў выбар паміж электрычным крэслам і растрэлам.

Адвакаты Оўэнса сцвярджалі, што ён не страляў у ахвяру, а абвінавачанні супраць яго былі сфабрыкаваныя саўдзельнікам.