У пятніцу ў цэнтральных раёнах Беларусі рэзка пахаладае

У пятніцу, 12 чэрвеня, у Беларусь пачне паступаць прахалодная паветраная маса з паўночнага захаду Еўропы. Чакаецца воблачнае з праясненнямі надвор'е, паведамляе Белгідрамет.

Часам прагназуюцца дажджы, удзень месцамі — моцныя дажджы. У асобных раёнах прагрымяць навальніцы. Уначы і зранку месцамі будзе згушчацца слабы туман. Вецер чакаецца паўночна-заходні ўмераны, пры навальніцах — парывісты.

Уначы тэрмометры пакажуць ад +6 па захадзе да +17 градусаў. Удзень прагназуецца 14-20 градусаў вышэй за нуль. У Мінску будзе 14-16 градусаў вышэй за нуль, ва ўсходніх раёнах паветра прагрэецца да 21-27 градусаў цяпла. У сувязі з рэзкім пахаладаннем у цэнтральных раёнах Беларусі сіноптыкі абвясцілі аранжавы ўзровень небяспекі.

У суботу і нядзелю ў Беларусі таксама прагназуюцца дажджы і парывісты вецер. Удзень тэрмометры пакажуць 14-22 градусы цяпла.