У расійскім самалёце, які збілі "вагнераўцы", загінула 10 чалавек
Збіты вагнераўцамі самалёт расійскіх ВКС
У расійскім самалёце, які 24 чэрвеня падчас "Маршу справядлівасці" на Маскву збілі вагнераўцы, загінула 10 чалавек. Пра гэта паведамляе расійская ваенная Z-карэспандэнтка Ірына Куксянкова:
"Па абноўленых дадзеных "Вагнера" пад Варонежам збілі не Іл-18, а Іл-22. На борце было 10 чалавек. Калі Прыгожына ўжо ў штабе Паўднёвай вайсковай акругі спыталі: навошта, бо гэты самалёт не наносіць удараў, а выконвае іншыя функцыі, — ён сказаў: "а дурань СПАшнік у калоне ўсё, што ўзлятала, збіваў..."
Па словах журналісткі, Яўген Прыгожын пагадзіўся выплаціць 50 мільёнаў у якасці кампенсацыі родным загінуўшых лётчыкаў.
Акрамя самалёта, за дзень вагнераўцы збілі ад 3 да 6 верталётаў ваенна-касмічных сіл Расіі. Гэта самыя цяжкія аднадзённыя страты, якія расейскія ВКС панеслі з пачатку поўнамаштабнага ўварвання ва Украіну.
