У сёмы дзень пратэстаў у Грузіі затрымалі аднаго з лідараў апазіцыі

У сёмы дзень пратэстаў у Грузіі затрымалі аднаго з лідараў апазіцыі. Сілавікі вынеслі Ніку Гварамія ("Ахалі", "Кааліцыя за перамены"), трымаючы яго за ногі і рукі, і вывезлі са сталіцы — у ізалятар часовага ўтрымання ў горадзе Марнеулі (30 км ад Тбілісі). У сераду ў офісах апазіцыйных партый і рухаў прайшлі ператрусы (сярод іншых — у маладзёжнай арганізацыі апазіцыйнай партыі "Адзіны нацыянальны рух"), затрымлівалі актывістаў, піша kavkaz-uzel.eu.

Увечары 4 снежня пратэстоўцы зноў збіраюцца каля будынка парламента Грузіі. Яны перакрылі праспект Руставэлі. Удзельнікі мітынгу патрабуюць распусціць парламент і правесці датэрміновыя выбары.

Пратэсты праходзяць і ў Батумі.

Грузіны выйшлі на вуліцы пасля таго, як прэм'ер-міністр Іраклій Кабахідзэ з кіроўнай партыі "Грузінская мара" аб'явіў, што Грузія адмаўляецца ад перамоваў аб уступленні ў Еўрасаюз. А перад гэтым грузінскі ўрад прыняў рашэнне аб прыпыненні еўраінтэграцыі. Раней Еўрапарламент не прызнаў вынікаў парламенцкіх выбараў у Грузіі, на якіх аб'явіла пра сваю перамогу "Грузінская мара". Падкрэсліваецца, што яны не адпавядалі міжнародным стандартам і абавязацельствам па арганізацыі свабоднага і сумленнага галасавання. Апазіцыйныя дэпутаты байкатуюць парламент, і там засталіся толькі праўладныя дэпутаты. На баку пратэстоўцаў прэзідэнтка Саломе Зурабішвілі.