Участковы выдаткаваў на дабрачыннасць "кампенсацыю маральнай шкоды"
Дзмітрый Казаренко уручае сертыфікат на суму ў 500 рублёў дырэктару інтэрната для састарэлых / УУС Брэсцкага аблвыканкаму
Участковы інспектар міліцыі Пружанскага РАУС Дзмітрый Казаранка падарыў дому састарэлых "кампенсацыю маральнай шкоды", паведамляе "Першы Рэгіён". Падарунак — сертыфікат на суму ў 500 рублёў — дастаўся Шаршэўскаму псіханеўралагічнаму дому-інтэрнату для састарэлых і інвалідаў.
Міліцыянт атрымаў маральную кампенсацыю ў памеры 300 рублёў у выніку суда над жанчынай, якая нібыта абразіла Дзмітрыя Казаранку ў сацсетках. Яна была прызнана вінаватай, прысуджана да двух гадоў "хатняй хіміі" і заплаціла 300 рублёў участковаму за прычыненне маральнай шкоды.
"У святле постэлектаральных падзей міліцыянт апынуўся на шляху негатыўна настроенай жанчыны, якая ў адным з телеграм-каналаў распаўсюджвала паклёп і абразы ў адрас супрацоўніка міліцыі", — так расказала аб сітуацыі УУС Брэсцкага аблвыканкаму.
Уручэнне сертыфіката адбывалася ва ўрачыстай абстаноўцы. Кіраўніцтва інтэрната выказала словы ўдзячнасці ў адрас Казаранкі за так патрэбную дапамогу.
"Хачу падзякаваць вам за аказанне нам дабрачыннага жэсту. Не часта так бывае, хацелася б часцей, каб такія людзі з'яўляліся і столькі ўвагі рабілі нам", — сказаў дырэктар установы.
