Удар па кішэні: каранавірус можа абваліць індустрыю турызму ў Грузіі

Праз тыдзень пасля таго, як грузінскае Міністэрства аховы здароўя заявіла пра першага заражанага каранавірусам у краіне, у Тбілісі прайшла сустрэча прадстаўнікоў гасцінічнага бізнесу. Па словах атэльераў, на сакавік і красавік у грузінскіх гасцініцах адмененыя да 90 працэнтаў броняў, і калі дзяржава не дапаможа ўладальнікам гасцініц субсідыямі, многія бізнесы проста не дажывуць да летняга сезона.

"Цяжэй за ўсё даводзіцца Тбілісі, таму што сезон тут пачынаецца якраз у сакавіку", — сказаў старшыня федэрацыі гасцініц і рэстаранаў Шалва Алавердашвілі.

У пачатку вясны ўладальнікі грузінскіх гасцініц чакаюць турыстаў з мусульманскіх краін, якія прыязджаюць на свята Наўруз-Байрам, якое адзначаецца ў сакавіку.

"Калі сітуацыя не зменіцца, то варта чакаць масавых скарачэнняў штату, у першую чаргу ў гасцініцах", — дадаў Алавердашвілі.

Па звестках федэрацыі гасцініц, у сферы турызму працаўладкаваны каля 100 тысяч чалавек: для Грузіі, насельніцтва якой складае каля 3 мільёнаў чалавек, гэта нямала. Многія з уладальнікаў гасцініц паспелі ўзяць крэдыты перад пачаткам новага сезона.

Пра субсідыі грузінскія ўлады пакуль маўчаць; нядаўна Міністэрства эканомікі ўжо прадказала, што памер страт, на якія асуджаны турыстычны сектар, можа скласці 11 мільёнаў долараў у месяц.   

У Грузіі чатыры пацверджаныя выпадкі захворвання на каранавірусную інфекцыю; усе чацвёра нядаўна былі за мяжой: два чалавекі прыехалі з Ірана, два — з Італіі. Яшчэ 24 пацыенты, якія знаходзяцца ў каранціне, чакаюць выніку лабараторнага аналізу. Усяго ў каранціне 140 чалавек, яшчэ 300 — у самаізаляцыі.

Самаізаляцыя — гэта значыць добраахвотная згода чалавека не пакідаць кватэру на працягу па меншай меры 14 дзён — гэта галоўнае патрабаванне да ўсіх, хто заязджае ў Грузію з "небяспечных" з пункту гледжання "кароны" краін. Да нядаўняга часу было незразумела, як павінны афармляцца такія пропускі з прычыны самаізаляцыі; у сацсетках многія пісалі, што працадаўцы не адпускалі сваіх супрацоўнікаў або змушалі іх узяць адпачынак за свой кошт.

На мінулым тыдні ў грамадстве кіпелі абмеркаванні сітуацыі, у якой адна з супрацоўнікаў банка, якія вярнуліся з Італіі, не звярнула ўвагі на гэту рэкамендацыю і выйшла на працу. Пад канец працоўнага дня дзяўчына адчула сябе блага, звярнулася да доктара, і неўзабаве ў яе выявілі вірус.

На гэтым тыдні Міністэрства аховы здароўя выпусціла нарматыўны акт пра тое, што дні, прапушчаныя з-за самаізаляцыі, павінны разглядацца як прапушчаныя па ўважлівай прычыне — і аплачвацца працадаўцам.

З 2 да 16 сакавіка прыпынены навучальны працэс у школах і дзіцячых садках, а Цэнтр кантролю захворванняў заклікаў універсітэты перайсці на анлайн-навучанне. У грамадскіх месцах праводзіцца дэзынфекцыя, тэатры і кінатэатры па ўсёй краіне адмянілі праграмы.

Па матэрыялах JAMnews 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.