U.G.oslavia “Странные люди”

27/06/2014 - 13:05

Праз два гады размоваў, студыйных пакутаў, амаль поўнай замены складу гурт U.G.oslavia нарэшце выдаў дэбютны альбом. “Странные люди”, па словах музыкаў, —самае частае словазлучэнне, якое яны чуюць у свой адрас. Менавіта таму яго і было вырашана зрабіць назвай першага паўнафарматнага студыйніка гурта. Іх музыка сапраўды выбіваецца з агульнага шэрагу маладых беларускіх гуртоў. Безліч пазітыву, усмешак, дзіцячага разгільдзяйства, станоўчага вар’яцтва і амаль поўная адсутнасць традыцыйных для беларускіх рокераў тугі, плачу ды, у пэўнай ступені, занудства.

U.G.oslavia радуе адсутнасцю ў песнях тэм кахання і ўсіх яго наступстваў. Кожны трэк — свая скончаная гісторыя, са зразумелымі яскравымі вобразамі і філасофскім падтэкстам. Вось толькі пачуць яго часам вельмі складана. Адчуванне, што звядзеннем некаторых трэкаў займаўся сябра музыкаў, які вельмі даўно і добра ведае іх творчасць, спявае іх песні напамяць і не прапускае ні аднаго канцэрта. З-за чаго разабраць словы на некаторых нумарах — задача не з лёгкіх.

U.G.oslavia пакуль не знайшла свайго ўласнага гучання. І пакуль гэтага не будзе зроблена, пранізлівы высокі жаночы вакал Юлі Багаслаўскай у любым выпадку будзе параўноўвацца з “Земфирай”, “Чичериной”, а можа і са Светай Бень. А пакуль музыкі эксперыментуюць, стылістыка скача ад абсалютна фарматнага поп-рока да крамянага панка.

“Странные люди” — вельмі дзявоцкі альбом. Але гаворка не пра тое, што ён для дзяўчат, ці выкананы дзяўчынай. Пасля праслухоўвання з’яўляецца моцнае адчуванне што гэта дыск-дзяўчынка, яна летуценная, занадта шчырая, яшчэ па-дзіцячы дурненькая і з-за гэтага такая мілая і прывабная.

Так атрымалася, што самыя моцныя трэкі менавіта тыя, што выходзілі ў якасці папярэдніх альбому сінглаў (“Птичка”, “Молодость”). Але пры гэтым альбом усё адно можна лічыць вельмі роўным без асаблівых правалаў і ўзлётаў. Так і трымаць! Чакаем працягу і наступнага паўнафарматніка.

Скачаць і паслухаць альбом “Странные люди” гурта U.G.oslavia можна тут!