Украіна: выдача расійскіх пашпартоў жыхарам Данбаса блакіруе "Мінскі працэс"
Выдача расійскіх пашпартоў жыхарам акупаваных тэрыторый Данбаса блакіруе "Мінскі працэс". Такую пазіцыю выказвае ўкраінскі бок па выніках сустрэчы Трохбаковай кантактнай групы па ўрэгуляванні сітуацыі на Данбасе, якая прайшла сёння ў Мінску. Паводле Даркі Аліфер, прэс-сакратаркі Леаніда Кучмы (ён прадстаўляе на перамовах Украіну), выдача расійскага грамадзянства жыхарам Данбаса ставіць пад пагрозу працэс мірнага ўрэгулявання канфлікту.
Усталяванне рэжыму цішыні магло б змяніць да лепшага сітуацыю з бяспекай у рэгіёне, перадусім для мірных жыхароў з абодвух бакоў лініі сутыкнення. Аднак абвастрэнне, якое назіраецца цягам апошніх дзён, замінае гэтай мірнай ініцыятыве. Падгрупе па бяспецы даручана распачаць падрыхтоўку да так званага "хлебнага перамір'я". У такіх умовах маніторынгавая група АБСЕ павінна атрымаць надзейны і бяспечны доступ па ўсёй тэрыторыі Украіны згодна з яе мандатам.
Таксама падчас сустрэчы закраналіся пытанні размініравання тэрыторыі Данбаса: там былі закладзеныя выбуховыя прыстасаванні на 7 тысячах квадратных кіламетраў. Н мінулым тыдні ў Марыупалі адкрыўся Цэнтр размініравання, які займаецца гэтай праблемай.
Абмяркоўвалася праца па вызваленні палонных асоб, а таксама пытанні стабільнага водазабеспячэння мірных жыхароў Данбаса.
