Урад Польшчы адобрыў новую міграцыйную стратэгію

Польскі ўрад напярэдадні прыняў дакумент "Аднавіць кантроль. Забяспечыць бяспеку. Комплексная і адказная міграцыйная стратэгія на 2025-2030 гады". Пра гэта паведамілі ў канцылярыі прэм'ер-міністра Польшчы Дональда Туска. Мера, якую анансаваў Туск (аб часовым прыпыненні прыёму заяў на прытулак), у стратэгіі ёсць.

"Пры пагрозе дэстабілізацыі краіны з-за наплыву імігрантаў павінна быць магчымасць часова і тэрытарыяльна прыпыніць права прымаць заявы аб прадастаўленні прытулку", – гаворыцца ў паведамленні канцылярыі прэм'ера. Там таксама зазначаецца, што "Польшча не можа дазволіць, каб пад маркай падачы заяў на прытулак нашу ўсходнюю мяжу перасякалі арганізаваныя і кантралюемыя Расіяй і Беларуссю групы нелегальных мігранта".
Асноўныя ідэі Стратэгіі зводзяцца да наступнага:

• прыярытэтам у сферы міграцыі будзе дзяржаўная бяспека;
• міграцыя павінна старанна рэгулявацца і кантралявацца з пункту гледжання мэты прыезду, маштабаў прытоку або краін паходжання замежнікаў;
• візавая палітыка павінна быць празрыстай, а консулы – атрымаць больш аўтаноміі ў прыняцці рашэнняў;
• працэдуры прадастаўлення нацыянальнай і міжнароднай абароны павінны быць скарэкціраваны. Новая сістэма павінна выключыць выкарыстанне механізму абароны ў гібрыдных дзеяннях;
• павінен быць зменены падыход да права на прытулак на ўзроўні ЕС і міжнародным узроўні. Ён павінен быць таксама адаптаваны да бягучай міграцыйнай сітуацыі з улікам пытанняў бяспекі; 
• і шэраг іншых мер.

У польскім урадзе лічаць, што гэтая стратэгія дасць магчымасць стварыць больш празрыстыя і бяспечныя правілы міграцыі ў Польшчу. Нагадаем, што напярэдадні аб намеры скарэктаваць міграцыйную палітыку заявілі і ў Еўразвязе.