Увага, пошук! Навукоўцы шукаюць яблыкі, якім змены клімату не шкодзяць #ІхНоравы

25/03/2024 - 15:03

#ІхНоравы / @rubanau_collage

Навіны з космасу вы самі ведаеце: беларуска Марына Васілеўская не з першага разу, але дабралася да арбіты. Мы расказвалі, што ў яе з сабой ёсць... пудра! Але не такая, пра якую вы падумалі.

Наогул, з навінамі з космасу на сёння ўсё. Пераходзім да навін планеты.

У Газе страшней, чым вы можаце сабе ўявіць

І пачнем з кепскіх. Медыцынскі крызіс у бальніцах Газы дасягнуў неймавернага ўзроўню, кажуць агенцтвы па аказанні дапамогі.

Брыгада хуткай медыцынскай дапамогі здолела прыехаць у адну з бальніц анклава. Медыкі кажуць, што людзі там ляжаць з неапрацаванымі адкрытымі ранамі, не хапае сродкаў для фіксацыі пераломаў, няма ежы.

Няма базавых медыцынскіх прадметаў — нават марлі. Давайце пастараемся не забываць, што проста цяпер у Газе адбываецца катастрофа. Вось што пра яе кажуць у ААН.

Праблемы ў Boeing

Выканаўчы дырэктар Boeing Дэйв Кэлхун сыдзе ў адстаўку на фоне крытыкі кампаніі ў сферы бяспекі палётаў. Усё пачалося ў студзені, калі ў самалёта неўзабаве пасля ўзлёту вылецелі... дзверы.

Ніхто не пацярпеў, але ўсе зноў загаварылі, што са стандартамі бяспекі ў фірмы нешта не тое.

У лісце супрацоўнікам Кэлхун назваў інцыдэнт "пераломным момантам" для Boeing. І сказаў, што кампаніі прыйшлося адрэагаваць на яго "пакорліва і з поўнай празрыстасцю".

Урэшце Кэлхун сышоў у адстаўку. І яго папярэднік Дэніс Мюленбург сышоў у адстаўку таксама праз тыя ж праблемы бяспекі. Праўда, тады яны выліліся ў некалькі буйных трагедый — так, менавіта, мы гаворым пра крушэнне борта MAX. Ахвярамі двух авіякатастроф сталі 346 чалавек.

Колькі ты зарабляеш?

Оскараўская актрыса Алівія Колман раскрытыкавала гендэрную няроўнасць у аплаце працы. Калі б яна была мужчынам, кінаіндустрыя плаціла б ёй больш, упэўненая Колман. Паводле яе слоў, няроўнасць у аплаце працы вынікае са старога стэрэатыпу пра тое, што менавіта акцёры-мужчыны прыцягваюць аўдыторыю.

"Але па сутнасці на працягу дзесяцігоддзяў гэта ўжо не адпавядае праўдзе. Але кінаіндустрыі па-ранейшаму падабаецца выкарыстоўваць гэта як падставу не плаціць жанчынам столькі ж, колькі мужчынам", — кажа акторка.

А як у вас на працы?

Тыя, якія выжылі

Навукоўцы шукаюць гатункі яблыкаў, якія многае перажылі і захаваліся да нашага часу. Навошта? Яны спрабуюць знайсці ў іх гены, якія дапамогуць сучасным гатункам яблыкаў перажыць кліматычныя змены.

Ёсць надзея, што некаторыя гатункі, якія перажылі і змены клімату, і атакі шкоднікаў, утрымліваюць нейкі ген дабрабыту. Цяпер тых, якія "выжылі", даследуюць і будуць спадзявацца, што іх генетычны код дапаможа выжыць і нашчадкам (размова ўсё яшчэ пра яблыкі).