Ва Ўсходняй Еўропе, у тым ліку ў Беларусі ўсё болей злоўжываюць апіятамі
У шэрагу краінаў Усходняй Еўропы, у тым ліку ў Албаніі, Беларусі, Малдове і Харватыі ўсё больш распаўсюджаным робіцца злоўжыванне апіятамі.
Пра гэта гаворыцца ў штогадовай справаздачы Міжнароднага камітэту ААН па кантролі над наркотыкамі. Міжнародныя эксперты паведамляюць, што сярод еўрапейскіх краінаў на дадзены момант Расія застаецца на першым месцы паводле колькасці асобаў, якія злоўжываюць наркотыкамі. У Расіі такіх людзей да 1 мільёна 800 тысяч.
Эксперты канстатуюць, што ў Еўропе расце разнастайнасць наркотыкаў, якія з’яўляюцца прадметам злоўжывання, у тым ліку рэчываў, што не трапляюць пад міжнародны кантроль.
Важным негатыўным фактарам у рэгіёне яны называюць выкарыстанне інтэрнэту для збыту наркотыкаў і здольнасць незаконнага рынка наркатычных рэчываў хутка прыстасоўвацца да зменаў прававога статусу псіхаактыўных рэчываў, паведамляе БелаПАН.
