Варыянт Чалага для рэферэндуму: калі ты супраць Лукашэнкі — галасуй за пункт два

Сяргей Чалы падзяліўся ідэяй пра тое, як апанентам дзеючых беларускіх уладаў паводзіць сябе на канстытуцыйным рэферэндуме. На думку аналітыка, змест рэферэндуму для грамадзянскай супольнасці не мае ніякага значэння: "Якая розніца паміж адным варыянтам Канстытуцыі "пад Лукашэнку" і іншым варыянтам Канстытуцыі "пад Лукашэнку"?". З іншага боку, Чалы супраць байкоту: "Відавочна, што Лукашэнка баіцца менавіта палітычнай мабілізацыі насельніцтва. Гэта значыць ісці на выбары трэба".

У гэтай сітуацыі Чалы прапануе наступнае. "Давайце сабе ўмоўна скажам: "Калі ты супраць Лукашэнкі — галасуй за пункт два". І абазначым сябе нейкімі знешнімі рэчамі. Напрыклад, маскамі. Белыя бранзалеты насіць нельга, але не будуць жа маскі здымаць АМАПаўцы і ГУБАЗіКі. А далей рабіце ўсё тое ж самае: працуе "Голас", фатаграфаванне бюлетэняў, гармонік [складваць бюлетэні гармонікам, каб яны былі заўважныя ў скрыні. — Еўрарадыё]. Наша задача — скарыстацца гэтым плебесцытам, каб прадэманстраваць сваю большасць. Нават у выпадку, калі ніякага значэння выбар не мае", — прапанаваў Чалы на стрыме ў суботу.

Рэферэндум па новай рэдакцыі Канстытуцыі Беларусі пройдзе ў канцы лютага 2022 года. Пра гэта нядаўна заявіла кіраўнік Савета рэспублікі Наталля Качанава.

Праект Канстытуцыі яшчэ ў працы. Нядаўна Аляксандр Лукашэнка на нарадзе ў Палацы Незалежнасці паспрабаваў абвергнуць, што ён пішацца "пад прэзідэнта". Маўляў, прэзідэнцкія паўнамоцтвы ў ім як раз-такі памяншаюцца. Аднак гэты аргумент не вытрымлівае ніякай крытыкі: канстытуцыйная рэформа праводзіцца па ініцыятыве дзеючых уладаў, і, у першую чаргу, Лукашэнкі і яго адміністрацыі.