Visa і Mastercard пакідаюць Расію
Карты Visa і Mastercard / Deutsche Welle
Амерыканскія плацёжныя сістэмы Visa і Mastercard прыпыняюць сваю дзейнасць у Расіі. Цяпер транзакцыі з картаў выпушчаных у Расіі, не будуць ажыццяўляцца за мяжой, а карты, выпушчаныя за мяжой, не будуць працаваць у Расіі.
"Мы вымушаныя пайсці на гэты крок з-за расійскага ўварвання ва Украіну і непрымальных падзей, сведкамі якіх мы сталі, — гаворыцца ў заяве Visa. — Гэтая вайна і пастаянная пагроза міру і стабільнасці патрабуе, каб мы рэагавалі ў адпаведнасці з нашымі каштоўнасцямі".
Паводле Цэнтрабанка, усе карты Visa і Mastercard, выпушчаныя расійскімі банкамі, працягнуць працаваць на тэрыторыі Расіі ў звычайным рэжыме — аперацыі па іх апрацоўваюцца ў Нацыянальнай сістэме плацёжных карт.
Але трансгранічныя аперацыі па картах Visa і Mastercard будуць недасяжныя. Гэта значыць імі расіяне не змогуць больш расплаціцца ў інтэрнэт-крамах і за мяжой.
"У выпадку выезду за мяжу рэкамендуецца браць з сабой наяўную валюту і карту "Мір" для тых краін, дзе яна прымаецца. На сённяшні дзень гэта Турцыя, В'етнам, Арменія, Беларусь, Казахстан, Кіргізія, Таджыкістан, Паўднёвая Асеція і Абхазія", — паведамілі ў ЦБ.
