Выбары ў Грузіі: укіды бюлетэняў і бойкі на выбарчых участках
Бойка каля ўчастка для галасавання / Facebook
Парламенцкія выбары ў Грузіі праходзяць 26 кастрычніка ў неспакойнай атмасферы. Улічваючы, што вынікі выбараў стануць лёсавызначальнымі для будучыні краіны, напружанасць адпаведная.
Так, ужо зафіксаваныя ўкіды бюлетэняў. Відэа з такім інцыдэнтам шырока разляцелася па сацыяльных сетках. Пазней ЦВК Грузіі ануляваў вынікі на гэтым участку.
@euroradio.lite Драматычныя выбары праходзяць у Грузіі. Па сутнасці вырашаецца не толькі склад парламенту і ўраду, але і будучыню — з Еўропай ці з Расіяй. Ужо зафіксавана і шмат правакацый, і ўкіды бюлетэняў, і бойкі на ўчастках. Беларусы, якія знаходзяцца ў Грузіі, заклікаем вас быць сёння і ў бліжэйшыя дні максімальна асцярожнымі і берагчы сябе. #навіны #грузія #сакартвэла #беларусыгрузіі #беларусыгрузии #выбарыўсвеце ♬ оригинальный звук Еўрарадыё.Лайт
Таксама адбыліся як мінімум бойкі каля выбарчых участкаў. Напрыклад, у Тбілісі напалі на выбаршчыцу, піша JamNews.
Удзень 26 кастрычніка прэзідэнтка Грузіі Саломе Зурабішвілі апублікавала відэазварот да кіраўніцтва міністэрства ўнутраных спраў: яна спрабавала звязацца з міністрам ці яго намеснікамі, але безвынікова. Прэзідэнтка хацела абмеркаваць супрацьдзеянне гвалту каля выбарчых участкаў.
Хто пераможа на выбарах — прадказаць немагчыма: адны апытанні сцвярджаюць, што кіроўная партыя "Грузінская мара" атрымае ўпэўненую перамогу, а іншыя паказваюць на магчымы трыумф праеўрапейскай апазіцыі.
