З гурта “Крама” сышоў бубнач Андрэй Філатаў
Змены адбыліся з-за занятасці Філа ў іншым музычным праекце. Яго месца заняў бубнач гурта “Палац” Андрэй Цераховіч.
4 верасня гурт “Крама” адыграў канцэрт ў клубе “Графіці” з новым бубначом. Замест Андрэя “Філа” Філатава месца за ўдарнай устаноўкай заняў Андрэй Цераховіч, які паралельна грае ў “Палацы”.
“Філ заняты ў клубным праекце, — тлумачыць замену бубнача лідар гурта Ігар Варашкевіч. — У іх шмат працы, яны вельмі запатрабаваныя на карпаратывах, у шынках. Ён пастаянна заняты, напрыклад, у чэрвені ён не мог з намі граць. Гэта першае. А па-другое, мяне не вельмі задавальняе яго манера грання. На жаль, гэта адкрылася толькі праз больш чым 10 гадоў. Мы адыгралі канцэрт з Цераховічам, было шмат груву, і мне было лягчэй, я амаль не стаміўся”.
Нагадаем, “Крама” ўжо каля трох гадоў працуе над новым альбомам, выданне якога зацягваецца з-за творчых разыходжанняў. Дагэтуль Ігар Варашкевіч спадзяецца на заканчэнне запісу, але не можа назваць нават прыблізнай даты рэлізу. Апошні альбом гурта “Усё жыццё — дзіўны сон” выйшаў у 2007 годзе.
