З пачатку года 35 нарказалежных звярнуліся па дапамогу ў працаўладкаванні

З пачатку 2018 года па дапамогу ў працаўладкаванні звярнуліся 35 нарказалежных жыхароў Беларусі. Пра гэта ў пятніцу, 3 жніўня, паведаміла кансультант упраўлення палітыкі і занятасці Міністэрства працы і сацыяльнай абароны Жанна Шчамялёва.

Па яе словах, працаўладкаванне — адна з эфектыўных мер сацыяльнай рэабілітацыі нарказалежных грамадзян. Сёння на заканадаўчым узроўні (інструкцыяй аб міжведамасным узаемадзеянні МУС, Міністэрства аховы здароўя і Міністэрства працы і сацыяльнай абароны) прадугледжана, што чалавеку, які прайшоў лячэнне або атрымаў неабходны аб'ём медыцынскай дапамогі, выдаецца індывідуальная праграма сацыяльнай рэабілітацыі. Пасля гэтага ён звяртаецца ў адпаведныя органы, якія накіроўваюць яго або на працу, альбо на перанавучанне.

Яна адзначыла, што сёлета па дапамогу ў працаўладкаванні звярнуліся 35 нарказалежных грамадзян (за ўвесь 2017-ы — 26). Больш за ўсё звяртаюцца ў Магілёўскай вобласці (23 чалавекі), піша minsknews.by. Затым ідуць Гродзенская (9), Мінская (2) і Гомельская (1).

"Як бачна, яшчэ пакуль не ўсе рэгіёны ўключыліся ў гэтую працу. Аднак у выніку ў 2018-м былі працаўладкаваныя ўжо 13 чалавек", — кажа Жанна Шчамялёва.