За падтрымку Украіны і ўдзел у пратэстах мінскую настаўніцу асудзілі на 5,5 года
Дар'я Хмяльніцкая / соцсети Д.Хмельницкой
Пяць з паловай гадоў зняволення прысудзілі мінскай настаўніцы Дар'і Хмяльніцкай за ўдзел у пратэстах і падтрымку Украіны, піша праект Dissidentby.
Прысуд 24-гадовай настаўніцы кітайскай мовы агучыла суддзя Алена Ананіч, вядомая сваім удзелам у палітычных працэсах.
Дар'я Хмяльніцкая закончыла філфак БДУ па спецыяльнасці "ўсходняя філалогія" і выкладала кітайскую мову ў сваёй роднай 23-й гімназіі ў Мінску. Таксама яна паступіла ў магістратуру філфака БДУ.
Дзяўчыну затрымалі ўвосень 2023 года. Хмяльніцкую абвінавацілі па двух артыкулах — ч. 1 арт. 342 КК (актыўны ўдзел у дзеяннях, якія груба парушаюць грамадскі парадак) і ч. 2 арт. 361-3 (фінансаванне ўдзелу на тэрыторыі замежнай дзяржавы ў ваенных дзеяннях).
Суд над ёй адбыўся ў красавіку, але прысуд стаў вядомы толькі цяпер.
