За што даюць медалі “За працоўныя заслугі” сантэхнікам ды зваршчыкам?

Медалём “За працоўныя заслугі” ўзнагароджаны болей за 30 беларусаў. Гэта ўзнагарода “за шматгадовую плённую працу, узорнае выкананне службовых абавязкаў і высокае прафесійнае майстэрства, а таксама значны асабісты ўклад у развіццё сваёй галіны”. Сярод узнагароджаных Еўрарадыё знаходзіць простых працоўных — вадзіцелі, мытнікі, выкладчыкі, а таксама слесары, экскаватаршчыкі ды сантэхнікі.

За якія дасягненні, напрыклад, ушанавалі кранаўшчыка ды электрагазазваршчыка з “Гродзенскага водаканала”? У аддзеле кадраў “Гроднаводаканала” Еўрарадыё спасылаюцца на доўгую працу:

"…Заслужаныя работнікі, кіраўніцтва аблвыканкама многа раз узнагароджвала, доўга працуюць".

Еўрарадыё: А вось, акрамя таго, што яны доўга працуюць і ўжо маюць узнагароды?..

Аддзел кадраў: “Машыніст экскаватара ў нас каля 30 гадоў. Працуе на ўнікальным абсталяванні, якое дазваляе ў гарадскіх умовах ажыццяўляць раскопкі пры аварыях. Тут патрэбна мець майстэрства, каб не пашкодзіць камунікацыі”.

У аддзеле кадраў тлумачаць, чаму і зваршчыка ўзнагародзілі медалём.

"Самі разумееце, карыстацца зваркай у кватэрах, у туалетах, дзе абмежаваныя ўмовы, каб не было ўзгаранняў, праблематычна. А ў яго ні разу не было ніякіх нараканняў. Да таго ж, прапановы па тэхніцы выканання", — кажуць у аддзеле кадраў прадпрыемства.

Якія наватарствы ў працы электрагазазваршчыка, спрабуем даведацца ў самога ўладальніка медалю Віктара Башуры. Той даведваецца пра ўзнагароду ад Еўрарадыё.

“Я зварку праводжу з люстэркам, але не я адзін так раблю — так многія робяць, трэба толькі прызвычаіцца”, — губляецца Віктар Башура.

Такую ж ўзнагароду атрымлівае і сантэхнік з Лідскага прадпрыемства жыллёва-камунальнай гаспадаркі. На прадпрыемстве гавораць, што тут ажно тры медалі — у сантэхніка, слесара ды слесара-рамонтніка. Але калі пачынаю дапытвацца, за што спецыялістаў ушанавалі, дакладна адказаць не могуць: чамусьці ўспамінаюць толькі пра ўзнагароды, а не пра дасягненні.

Сантэхнік Роберт Карымаў медалю радуецца, адразу пачынае распавядаць пра брыгаду. Патлумачыць, за якія заслугі мае медаль, не можа, бо не ведае.

“Я ўжо 20 гадоў кірую гэтай брыгадай. Мы разам заўсёды, адзін аднаго падтрымліваем. А з-за чаго медаль далі — я і сам не ведаю, значыць ацанілі трошкі маю працу”.