Захад: Расія зладзіла кібератаку на Украіну за гадзіну да нападу 24 лютага
Расійскія ўлады зладзілі кібератаку на спадарожнікавую сетку Украіны за гадзіну да нападу 24 лютага. Такім чынам яны рыхтавалі глебу для агрэсіі. Пра гэта заявілі прадстаўнікі Еўрасаюза.
Гэта першае афіцыйнае абвінавачванне Расіі з боку ЕС.
"Еўрапейскі Саюз і яго дзяржавы-чальцы разам са сваімі міжнароднымі партнёрамі рашуча асуджаюць зламысную кіберактыўнасць, якая праводзіцца Расійскай Федэрацыяй супраць Украіны і якая нацэленая на спадарожнікавую сетку KA-SAT, кіраваную Viasat", — гаворыцца ў паведамленні блока, якое цытуе Бі-Бі-Сі.
Гэтая кібератака выклікала значныя збоі ў працы дзяржаўных органаў, прадпрыемстваў і карыстальнікаў ва Украіне, а таксама закранула некалькі дзяржаў-чальцоў ЕС.
Еўрапейскія правайдары ў сакавіку заявілі, што атака на амерыканскага спадарожнікавага аператара Viasat адключыў тысячы інтэрнэт-карыстальнікаў у Германіі, Францыі, Венгрыі, Грэцыі, Італіі ды Польшчы.
Раней Еўрасаюз толькі выказваў здагадкі, што кібератакі ішлі з Расіі. Аднак цяпер у ЕС ёсць дастаткова доказаў, каб заявіць, што за кібератакай стаіць расійская дзяржава, заявіў вярхоўны прадстаўнік ЕС па замежных справах і палітыцы бяспекі Жазэп Барэль.
