Здымкі міністра, якая аблізвае марозіва, выклікалі скандал (фота)
У Twitter з'явіўся хэштэг "я таксама ведаю, як гэта рабіць".
Фотаздымкі італьянскага міністра па дзяржаўным кіраванні Марыяны Мадзія, на якіх яна аблізвае марозіва, надрукаваныя часопісам Chi пад правакацыйным загалоўкам, выклікалі сэксісцкі скандал у Італіі. Нумар выдання з'явіўся ў продажы на гэтым тыдні. Папарацы зрабіў фота ў той момант, калі 34-гадовая міністр знаходзілася ў аўтамабілі са сваім мужам і ела марозіва.
Здымкі былі апублікаваныя пад загалоўкам "Яна ведае, як гэта рабіць з марозівам". Многія яго палічылі двухсэнсоўным, пачалося гарачае абмеркаванне ў сацыяльных сетках. За міністра заступіліся як звычайныя чытачы, так і вядомыя асобы, якія расцанілі апублікаваныя здымкі як непрыстойныя, вульгарныя і ганебныя.
Саюз журналістаў Ламбардыі адкрыў дысцыплінарную справу ў дачыненні да галоўнага рэдактара часопіса Альфонса Сіньёрыні, які, на іх думку, груба парушыў этычныя прынцыпы журналістыкі, інфармуе РІА "Новости".
У той жа час на Апенінах знайшліся тыя, хто з іроніяй ўспрыняў фота міністра. У прыватнасці, у Twitter з'явіўся хэштэг "я таксама ведаю, як гэта рабіць", пад якім некаторыя карыстальнікі сталі выкладваць як уласныя здымкі, так і фота сабак, малпаў з марозівам. Людзі заклікаюць рэдактара Chi апублікаваць і гэтыя здымкі.
