Жонка матацыкліста Сяргея Шаўцова: Да яго не пускаюць нават мяне

Аварыя з удзелам матацыкліста, інспектара ДАІ і аўтамабіля інкасатараў адбылася на скрыжаванні Незалежнасці і Казлова ў панядзелак, 18 красавіка. У выніку яе моцна пацярпелі супрацоўнік ДАІ і матацыкліст. Аварыя набывае шырокі розгалас, версіі ДАІ і матацыкліста разыходзяцца. Як даведалася Еўрарадыё, да Шаўцова не пускаюць нават жонку.

Еўрарадыё: Дар'я, што з вашым мужам цяпер, дзе ён знаходзіцца?

Дар'я: Сяргей цяпер у бальніцы хуткай дапамогі. У яго чэрапна-мазгавая траўма, пералом верхняй сківіцы. Я не эксперт, але там, здаецца, яшчэ збіраецца кроў у пазухах. Я змагла ўчора ўвечары з ім пабачыцца, да таго як яму забаранілі званкі і сустрэчы. Ён у свядомасці. Абязбольвальнае калолі. Гаварыў Сяргей добра.

Еўрарадыё: Чаму вашаму мужу забаранілі карыстацца тэлефонам, як гэта адбылося?

Дар'я: Я без паняцця. Апошні раз пазваніў, расказаў, што тэлефон забіраюць. І папрасіў, каб я сёння прыехала. Я сёння паспрабавала дазваніцца да яго, потым на пост званіла да медсястры. І медсястра ад аховы даведалася, што сустрэчы забароненыя, званкі забароненыя. Сёння я была ў доктара, які лечыць Сяргея. Медыкі хадзілі да аховы, спрабавалі даведацца ў міліцыянтаў, ці можна мне да Сяргея. Міліцыянты забаранілі.

Еўрарадыё: Была інфармацыя, што вашага мужа збіраюцца перавесці на Акрэсціна. Гэта праўда?

Дар'я: Так, ён мне таксама пра гэта ўчора гаварыў. Спачатку збіраліся пераводзіць, нягледзячы на складаны стан. Але потым перазваніў і сказаў, што пакідаюць у бальніцы, але забараняюць карыстацца тэлефонам.

Еўрарадыё: Раскажыце, калі ласка, што вы ведаеце пра аварыю. Што вам расказаў Сяргей?

Дар'я: Сяргей пад'ехаў да скрыжавання і спыніўся на чырвоны. Інспектар падышоў, папрасіў паказаць дакументы. Муж пагадзіўся. Толькі сказаў, што спачатку адгоніць матацыкл да краю праезнай часткі. І тут міліцыянер альбо не пачуў гэтых словаў, альбо падумаў, што Сяргей збіраецца ўцякаць. Інспектар схапіўся за руль і націснуў на газ. Пасля гэтага матацыкл вынесла на скрыжаванне, дзе ў яго ўрэзаўся інкасатарскі аўтамабіль.

Еўрарадыё: ДАІ сцвярджае, што ваш муж неаднаразова парушаў правілы дарожнага руху — 52 разы. Наколькі гэта адпавядае праўдзе?

Дар'я: Я не памятаю, якую лічбу называе ДАІ, колькі разоў мужа пазбаўлялі правоў. Наколькі ведаю, статыстыка па парушэннях павінная рэгістравацца за год, а не за ўвесь час валодання правамі. Як сказаў Сяргей, ён за ўсе свае парушэнні ўжо адказаў. І падымаць цяпер гэтыя лічбы — гэта імкненне яго ачарніць.

Еўрарадыё: Што гэта былі за парушэнні?

Дар'я: Дакладна пра ўсе я не магу ведаць. Але гэта было перавышэнне хуткасці, забытыя дома дакументы. Паркоўка, магчыма. Я не магу сказаць, што мой муж нейкі злосны кіроўца, які ездзіць як невядома хто. У яго вялікі стаж кіравання. Ён вельмі акуратна водзіць і аўтамабіль, і матацыкл.

Еўрарадыё: Вам даводзілася ездзіць разам з ім?

Дар'я: Канечне.

Еўрарадыё: Яшчэ адно пытанне пра камеру, якая нібыта была замацаваная на шлеме вашага мужа ў момант аварыі, яна выкарыстоўвалася ў якасці рэгістратара. Вы ведаеце нешта пра яе лёс, пра тое, дзе цяпер запіс з гэтай камеры?

Дар'я: Я пра гэта нічога не ведаю. Пра камеру Сяргей не гаварыў.