ЗША таемна паставілі Украіне ракеты вялікай далёкасці ATACMS — Reuters

Апошнія тыдні ЗША таемна пастаўлялі Украіне ракеты далёкага радыусу дзеяння ATACMS. А на мінулым тыдні Украіна ўпершыню выкарыстала іх. Пра гэта журналістам агенцтваў Reuters і Associated Press паведамілі амерыканскія чыноўнікі на ўмовах ананімнасці, пераказвае Бі-Бі-Сі.

Паведамляецца, быццам гэтыя ракеты былі ўключаныя ў пакет вайсковай дапамогі на суму 300 мільёнаў долараў, які быў ухвалены 12 сакавіка. Колькі менавіта ракет было адпраўлена Украіне — не ўдакладняецца.

Упершыню ўкраінцы выкарысталі ракеты ATACMS зранку 17 красавіка — для ўдару па аэрадроме ў Джанкоі ў анэксаваным Крыме. Гэты аэрадром размяшчаецца прыкладна за 165 км ад украінскай лініі фронту. Таксама чыноўнікі паведамілі журналістам, нібыта ўдары ракетамі ATACMS былі нанесеныя і па расійскіх войсках на акупаванай тэрыторыі.

Яшчэ большая колькасць ракет нібыта будзе прадастаўленая ў рамках новага пакета ваеннай дапамогі, пра які Пентагон паведаміў сёння.

ATACMS сярэдняй далёкасці былі ўпершыню пастаўленыя ва Украіну ў верасні 2023 года. Спярша Вашынгтон выступаў супраць пастаўкі Кіеву дальнабойных ракет з радыусам дзеяння да 300 км — у Штатах асцерагаліся, што іх будуць выкарыстоўваць для атак па тэрыторыі Расіі.