Абраны новы генеральны сакратар ААН
13 кастрычніка быў абраны новы генеральны сакратар Арганізацыі Аб'яднаных Нацый. Ім стаў партугалец Антоніу Гутэрыш. Яго кандыдатуру зацвердзіла Генеральная асамблея ААН (раней яе падтрымаў Савет бяспекі ААН). Паўнамоцтвы Гутэрыша працягнуцца ад 1 студзеня 2017-га да 31 снежня 2021 года, інфармуе "Бі-Бі-Сі". Яшчэ 2,5 месяцы арганізацыяй будзе кіраваць Пан Гі Мун, які адбывае ўжо другі пяцігадовы тэрмін на пасадзе генсека.
Антоніу Мануэль дэ Алівейра Гутэрыш нарадзіўся ў 1949 годзе ў Лісабоне. Мае вышэйшую тэхнічную адукацыю. Былы генеральны сакратар Сацыялістычнай партыі. Быў прэм'ер-міністрам Партугаліі (у 1995-2002 гадах). З 2005-га займаў пасаду вярхоўнага камісара ААН па справах бежанцаў. Свабодна валодае партугальскай, іспанскай, англійскай і французскай мовамі.
