Актывіст прарасійскага руху "спыніў беларусізацыю" ў Браславе

Браслаўскія ўлады анулявалі вынікі апытання наконт мовы шыльдаў у горадзе і раёне (з пазначэннем назваў устаноў, арганізацый, вуліц), у якім 90% удзельнікаў прагаласавалі за беларускую, інфармуе Радыё Свабода.

У лістападзе яно праходзіла на сайце раённай газеты "Браслаўская зорка". Пра гэтую акцыю паведамілі цэнтральныя СМІ, пасля чаго ў райвыканкам у Браслаў прыйшоў зварот ад актывіста прарасійскага руху ў Беларусі Арцёма Агафонава з Асіповічаў. Ён заявіў, што вынікам апытання не трэба давяраць, бо адбылася "фальсіфікацыя".

Намесніца старшыні Браслаўскага раёвыканкама Вольга Вялічка падзякавала Агафонаву "за актыўную жыццёвую пазіцыю". Чыноўніца паведаміла, што апытанне спынілі, паколькі ў ім пачалі ўдзельнічаць "не толькі жыхары горада Браслава і Браслаўскага раёна". У выніку, Арцём Агафонаў лічыць, што ён "перамог" і "спыніў беларусізацыю" ў Браславе. А якая насамрэч будзе сітуацыя з мовай шыльдаў у горадзе, пакуль незразумела.

Сёлета Агафонаў дамагаўся ад мясцовых уладаў, каб яны зрабілі графіці на будынку ў Слоніме двухмоўным, абураўся беларусізацыі назвы станцыі ў Асіповічах.