Андрэй Дзмітрыеў — пра затрыманне і вызваленне: "Спіс артыкулаў вялізны"
Кіраўнік арганізацыі "Гавары праўду", экс-кандыдат у прэзідэнты 2020 года Андрэй Дзмітрыеў крыху расказаў пра затрыманне і вызваленне. У стрыме на сваім YouTube-канале ён сказаў, што даў падпіску аб неразгалошванні.
Пра затрыманне Дзмітрыева стала вядома 12 жніўня. Але ўвечары ён ужо быў дома. Затрымалі палітыка каля брамы школы, куды ён адвёў дзяцей у летні лагер. Пасля быў ператрус дома, падчас якога забралі ўсю тэхніку. Далей — допыт. "Спіс артыкулаў вялізны", — сказаў Андрэй Дзмітрыеў.
Можна меркаваць, што затрыманне адбылося па справе платформы "Сход". Дзмітрыеў не выключаў, што яго, як і экс-амбасадара Ігара Ляшчэню, таксама адправяць на Акрэсціна. Аднак яму сказалі "Ідзіце". Ляшчэню затрымалі па справе аб "масавых беспарадках" у Мінску і правяраюць на датычнасць "да здзяйснення дзеянняў, якія груба парушаюць грамадскі парадак".
