Асцярожна, пакемоны вас давядуць! Вопыт японскага мафіёзі — #ІхНоравы

08/05/2024 - 15:37

#ІхНоравы / @rubanau_collage

Гэта рэгулярны агляд сусветных навін, у якім не будзе ні слова пра Еўрабачанне. А ўсё, што мы хацелі сказаць пра Еўрабачанне, чытайце тут.

Бомбаў больш не будзе

ЗША прыпынілі пастаўку бомбаў Ізраілю. Там непакояцца з прычыны наземнай аперацыі ў горадзе Рафах на поўдні Газы.

Вашынгтон нагадваў і нагадваў Тэль-Авіву, што ў горадзе жыве вялікая колькасць мірных жыхароў. Але Ізраіль "не поўнасцю ўлічыў" занепакоенасць ЗША. І таму застаўся без бомбаў.

Аказалася, што часам "заклапочанасць" заходніх палітыкаў большая, чым проста словы.

Між тым ізраільскія чыноўнікі кажуць, што не бачаць ніякіх прыкмет прарыву ў перамовах аб перамір'і з ХАМАС, якое дазволіла б вызваліць закладнікаў. А амбасадар Ізраіля ў Вялікабрытаніі кажа, што антысемітызм яшчэ ніколі дасягаў такога піку, як цяпер. Ён мае на ўвазе студэнцкія пратэсты ва ўніверсітэцкіх кампусах у ЗША і Вялікабрытаніі.

Яшчэ гарачэй

Тэмпература ў сусветным акіяне б'е рэкорд. З аднаго боку вінаватыя парніковыя газы. Але ёсць і іншая, прыродная прычына — Эль-Ніньё. Так называюць ваганне тэмпературы вады на паверхні Ціхага акіяна.

Усё разам прыводзіць да перагрэву акіянаў, а гэта б'е па марской фауне. Напрыклад, аказалася, што з-за больш цёплай вады каралы пачалі страчваць колер.

Акіяны гадамі дапамагалі нам справіцца з глабальным пацяпленнем. Яны паглынаюць каля чвэрці вуглякіслага газу. І каля 90% лішку цяпла. Але ў апошнія гады і ў акіянаў сілы ўжо на сыходзе. У лютым і сакавіку гэтага года паверхня сусветнага акіяна дасягнула новага глабальнага сярэдняга дзённага максімуму і прагрэлася да 21,09°C.

Пра што гамоняць кіты?

Навукоўцы пачынаюць расшыфроўваць размовы кашалотаў. І ўжо разабралі іх "алфавіт".

Кашалоты размаўляюць серыямі шчаўчкоў — навукоўцы называюць іх кодамі. Шчоўканне гэтае вельмі гучнае — гучнейшае за стрэлы з драбавіка. Гэтыя серыі і з'яўляюцца будаўнічымі блокамі кітовай мовы.

У мове кашалотаў каля 300 тыпаў розных кодаў, усе яны адрозніваюцца працягласцю, рытмам, тэмпам.

Разабраўшы алфавіт кіта, навукоўцы цяпер паспрабуюць зразумець значэнне "словаў", якія вымаўляе гэты марскі сысун. Што хоча сказаць кашалот, калі шчоўкае? Настолькі добра мову кашалотаў даследчыкі пакуль не вывучылі.

Да чаго могуць давесці пакемоны

Удзельніка японскай мафіі Якудза арыштавалі за... крадзеж калекцыйных картак з пакемонамі. 39-гадовы мафіёзі, які ўваходзіць у склад другога па велічыні сіндыката, скраў і нейкія іншыя рэчы на паўтары тысячы еўра, але медыя, вядома ж, зацікавіліся кішэннымі монстрамі.

Медыя пішуць, што калі мафіёзі арыштавалі, ён паводзіў сябе вельмі сціпла. Як чалавек, які збірае карткі з пакемонамі, а не водзіцца з бандытамі.

Японскае медыя піша, што ў краіне апошнім часам назіраецца ажно ўсплёск колькасці крадзяжоў калекцыйных картак. Але мафіёзі ў ролі выкрадальніка Пікачу ўсё роўна ўражвае.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.