"Атлусценне" аўтамабіляў і "сіндром "Прыбіральні Skibidi" — #ІхНоравы

22/01/2024 - 15:35

Замежныя навіны / @rubanau_collage

У Вялікабрытаніі і ЕС "таўсцеюць" аўтамабілі — і гэта выклікае трывогу ў некаторых грамадзян, як і серыял "Прыбіральня Skibidi", які з хуткасцю святла заваёўвае ўвагу мільёнаў падлеткаў. Нягледзячы на ўсе перажыванні, у свеце застаюцца шчаслівыя людзі, якіх задавальняе іх жыццё. А самыя задаволеныя еўрапейцы жывуць у Аўстрыі.

Падрабязней пра гэта і не толькі чытайце ў традыцыйнай рубрыцы Еўрарадыё "Іх норавы".

Самыя задаволеныя еўрапейцы жывуць у Аўстрыі

Паводле звестак Еўрастата, у Аўстрыі жывуць самыя задаволеныя жыццём людзі. Па шкале ад 0 (найгоршая) да 10 (найлепшая) задаволенасць жыццём аўстрыйцаў у цэлым складае 7,9 бала. Гэта вышэй, чым, напрыклад, у чэхаў, немцаў, французаў, іспанцаў або італьянцаў.

У той жа час балгары ледзь трапляюць у станоўчы дыяпазон і з 5,6 бала з'яўляюцца адзінай краінай, якая не дацягвае да шасці балаў.

Дадзеныя паказваюць цікавы феномен, калі задаволенасць жыццём расце разам з атрыманнем вышэйшай адукацыі.

Агульны ўзровень задаволенасці ў Еўропе расце ў доўгатэрміновай перспектыве, і большасць краін паведамляе пра паляпшэнне паказчыкаў у перыяд з 2013 да 2022 года. Самае прыкметнае паляпшэнне назіраецца на Кіпры, дзе гэты паказчык вырас на адзін поўны пункт. Немцы, наадварот, сталі на 0,8 пункта менш задаволеныя.

"Ожирение" автомобилей и "синдром "Туалета Skibidi" — #ИхНравы

Вынікі даследавання / Eurostat

Серыял "Прыбіральня Skibidi" заваёўвае свет

На серыял пра жахлівыя анімаваныя галовы, якія жывуць у прыбіральнях, падпісалася больш за 38 мільёнаў чалавек.

"Прыбіральня Skibidi" — гэта анімацыйны вэб-серыял на YouTube, створаны грузінскім аўтарам кантэнту Аляксеем Герасімавым. Сёння яго канал на YouTube DaFuq!?Boom! уваходзіць у сотню найлепшых каналаў YouTube у свеце па колькасці падпісчыкаў. Цяпер налічваецца больш за 70 эпізодаў серыяла, прычым новыя відэа загружаюцца кожныя некалькі дзён.

Папулярнасць "Прыбіральні Skibidi" у асноўным абумоўленая дзецьмі ва ўзросце да 13 гадоў. Гэта першы мем, на які скардзяцца прадстаўнікі пакалення Z, маўляў, не разумеюць яго, бо занадта старыя.

Новыя аўтамабілі сталі настолькі разадзьмутымі, што часам не могуць змясціцца на парковачных месцах, спраектаваных у адпаведнасці з мінімальнымі вулічнымі стандартамі ў многіх краінах. Сярэдняя шырыня новага аўтамабіля ў ЕС і Вялікабрытаніі перавысіла 180 см у першай палове 2023 года.

Пісьменніца стала лаўрэаткай прэміі з дапамогай ChatGPT. Гэта наогул нармальна?

Рыэ Кудан, лаўрэатка самай прэстыжнай літаратурнай узнагароды Японіі, прэміі Акутагавы, расказала, што частка яе новай кнігі напісаная щнікальным "аўтарам-прывідам": ChatGPT.

Апошні раман пісьменніцы "Такійская вежа спагады" выклікаў захапленне ў журы Акутагавы, якое палічыла яго "настолькі дасканалым, што цяжка знайсці ў ім недахопы".

Дзеянне рамана Кудан адбываецца ва ўяўнай недалёкай будучыні, дзе ШІ стаў неад'емнай часткай паўсядзённага жыцця. У ім гаворыцца пра архітэктарку, якая будуе вежу ў такійскім парку, прызначаную для перавыхавання злачынцаў, а таксама яе дыскамфорт ад памяркоўнасці грамадства да парушальнікаў закона.

Кудан лічыць, што генератыўны штучны інтэлект дапамог ёй раскрыць яе творчы патэнцыял, і хоча падтрымліваць "добрыя адносіны" з ШІ.

Аднак не ўсе чытачы ўхваляюць гэтую практыку, лічачы яе сумнеўнай.

Арганізацыя, якая прысуджае прэмію Акутагавы, пакуль ніяк не пракаментавала заявы пераможцы.