Беларусь не дае прытулак украінцам, якія ўхіляюцца ад мабілізацыі

Беларусь адмаўляецца даваць прытулак грамадзянам Украіны, якія ўхіляюцца ад мабілізацыі. Пра гэта заявіў начальнік дэпартамента па грамадзянстве і міграцыі МУС Беларусі Аляксей Бягун.

У міліцэйскага чыноўніка запыталіся, на якіх падставах украінцам могуць адмовіць у прадастаўленні статусу бежанца. У адказ Бягун, як перадае ria.ru, паведаміў, што "ў асноўным гэта асобы прызыўнога ўзросту, якія прыбываюць з іншых рэгіёнаў Украіны і якія ў якасці матываў падачы хадайніцтва кажуць, што могуць быць падвергнутыя мабілізацыі".

Раней Бягун казаў, што ад пачатку баявых дзеянняў у Данбасе ў Беларусь прыбылі 150 тысяч грамадзян Украіны. Больш за 45 тысяч з іх атрымалі права на пражыванне ў нашай краіне. Цяпер разглядаецца каля 1300 хадайніцтваў ад грамадзян Украіны наконт надання статусу бежанца ці іншай дадатковай абароны. Больш за 1100 грамадзян Украіны ўжо атрымалі дадатковую абарону.

Фота: БЕЛТА