"Белавія" ўсё ж запускае ў рэйсы Boeing 737 MAX

Нацыянальная авіякампанія "Белавія" паведаміла, што праверыла і падрыхтавала Boeing 737-8 да пасажырскіх рэйсаў. Мяркуецца, што сёння борт выканае два палёты — у Варшаву і Кіеў, гаворыцца ў паведамленні, размешчаным на сайце авіяперавозчыка.

Нагадаем, што пасля дзвюх смяротных авіякатастроф з удзелам самалёта гэтай камплектацыі ў сакавіку 2019 года ў ЗША была ўведзеная забарона на выкарыстанне гэтай мадэлі. Мінулай восенню забарону знялі, аднак у красавіку ўжо гэтага года стала вядома, што ў гэтых самалётаў магчымыя праблемы з электрыкай. У выніку 24 авіякампаніі па ўсім свеце прынялі рашэнне аб прыпыненні палётаў 737 Max.

У "Белавіі" кажуць, што вытворца рэкамендаваў "правесці інспекцыю электрычнай схемы адной з дублявальных сістэм электразабеспячэння самалётаў".

"Гаворка была пра нязначны тэхнічны нюанс, які ніяк не звязаны з праграмным забеспячэннем. Працу маглі выканаць спецыялісты "Белавіі", аднак кампанія-вытворца накіравала да сваіх заказчыкаў брыгаду ўласных спецыялістаў", — паведамілі ў "Белавіі". Дапрацоўку завяршылі на гэтым тыдні.

Пасля гэтага былі праведзеныя праверка і тэставыя палёты. На трэніроўцы прысутнічаў генеральны дырэктар "Белавіі" Ігар Чаргінец, кіраўніцтва Дэпартамента па авіяцыі, авіяцыйная інспекцыя і прадстаўнікі Boeing.

"Усё прайшло добра. Сёння мы гатовыя пачаць выконваць першыя камерцыйныя рэйсы на гэтым самалёце. Мадэль паветранага судна 737-8 можна лічыць адным з самых бяспечных самалётаў у гісторыі, дзякуючы працы, якую зрабіла кампанія Boeing", — заявіў па выніках тэставых палётаў Чаргінец.