БЕЛТА: Калеснікава затрыманая пры спробе перасячы мяжу
Марыя Калеснікава затрыманая памежнікамі пры спробе перасячы мяжу, паведамляе дзяржаўнае інфармагенцтва БЕЛТА са спасылкай на Дзяржаўны памежны камітэт.
Афіцыйны прадсаўнік Памежнага камітэта Антон Бычкоўскі паведаміў агенцтву, што 8 верасня каля 4:00 Антон Раднянкоў, Іван Краўцоў і Марыя Калеснікава ехалі праз міжнародны пункт пропуску "Аляксандраўка" ў бок Украіны.
"З улікам асаблівасцяў інфраструктуры пункта пропуску і праходжання лініі дзяржаўнай мяжы на гэтым участку ажыццяўляецца ўзмацненне аховы дзяржмяжы і былі выстаўленыя дадатковыя памежныя нарады", — удакладніў Бычкоўскі. Па яго словах, Калеснікава, Раднянкоў і Краўцоў прайшлі мытны кантроль і паехалі ў бок Украіны. Але потым яны пабачылі яшчэ адзін памежны нарад.
"Машына рэзка паскорылася, стварыўшы пагрозу жыццю ваеннаслужачаму органаў пагранслужбы. Калеснікава апынулася па-за транспартным сродкам. Па сутнасці, яе выпхнулі з яго і працягнулі рух у бок Украіны", — перадае БЕЛТА словы памежніка.
Паведамляецца, што Калеснікава на цяперашні час затрыманая.
Раней Марыя Калеснікава казала паплечнікам, што не збіраецца пакіддаць Беларусь. Не выключана, што яна супраціўлялася высылцы в Украіну.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
