Больш за палову шматдзетных бацькоў выкарыстаюць сямейны капітал датэрмінова

Больш за палову шматдзетных бацькоў у Беларусі вырашылі датэрмінова выкарыстаць сродкі сямейнага капіталу. Як паведамляе Мінпрацы, пададзена 81749 адпаведных заяў (год раней іх было крыху больш за 67 тысяч). 79338 былі задаволеныя (летась — 65 тысяч). 

81,4% хочуць выкарыстаць сямейны капітал для паляпшэння жыллёвых умоў, 10,8% — для атрымання медыцынскіх паслуг, 7,7% — для адукацыі. Людзі вырашылі не чакаць, пакуль дзеці вырастуць, каб перадаць ім грошы, якія да таго часу раслі б на дэпазіце (але не факт, што яны выраслі б).

На 1 лютага 2024 года сямейны капітал быў налічаны 134703 шматдзетным сем'ям. 

Сямейны капітал прызначаецца сем'ям пры нараджэнні (усынаўленні, удачарэнні) трэцяга або наступных дзяцей. Магчымасць выкарыстаць яго сродкі датэрмінова з'явілася ў 2020 годзе.