Брэсцкі суд адмовіўся спыняць будаўніцтва акумулятарнага завода

27 сакавіка суд Маскоўскага раёна Брэста агучыў рашэнне па справе супраць будаўніцтва акумулятарнага завода, піша сайт greenbelarus.info. 

Заяву ў суд падавала група грамадзяна разам з грамадскім аб’яднаннем “Экадом”. Заяўнікі патрабавалі спыніць будаўніцтва завода да правядзення паўторнага грамадскага абмеркавання актуальнай справаздачы аб ацэнцы ўплыву прадпрыемства на навакольнае асяроддзе.

Кампанія “Айпаўэр”, якая вядзе будаўніцтва, і райвыканкам не пагаджаліся з выстаўленымі патрабаваннямі. Суд прыняў рашэнне на іх карысць.

Юрыст ГА “Экадом” Сяргей Магонаў, тым не менш, задаволены вынікам. Па яго словах, у судовым рашэнні замацаваныя ўсе хібы і парушэнні заканадаўства, дапушчаныя Брэсцкім райвыканкамам. 

"Па-другое, гэты праект фактычна прайшоў цяпер грамадскае абмеркаванне. Хоць яго так хавалі ад грамадскасці, маніпулявалі з датамі і са зместам справаздачы, фактычна атрымалася так, што ў судовым пасяджэнні прайшло грамадскае абмеркаванне. Грамадскасць змагла выказаць сваю думку, і гэтая думка стала вядомай нашмат шырэйшаму колу слухачоў і гледачоў, чым калі б гэтае абмеркаванне праводзілася, напрыклад, у Тэльмах у Брэсцкім раёне. Канечне, судовае паседжанне не служыць такім мэтам, але так ужо атрымалася”, — падсумоўвае Магонаў.

Цяпер "Экадом" плануе аспрэчваць дзяржаўную экалагічную экспертызу, бо без гэтага немагчыма правесці паўторнае грамадскае абмеркаванне.

Сённяшняе рашэнне суда, хутчэй за ўсё, таксама будзе абскарджвацца.