Бруднае паветра Еўропы і перамір'е ў сектары Газа — #ІхНоравы

24/11/2023 - 14:27

Замежныя навіны / @rubanau_collage

Пакуль у сектары Газа вызваляюць закладнікаў, польскія дальнабойшчыкі працягваюць страйк на ўкраінскай мяжы. Што не так з паветрам Еўропы і навошта ў Іспаніі стварылі першую віртуальную мадэль?

Падрабязней пра гэта чытаем у рубрыцы Еўрарадыё "Іх норавы".

У сектары Газа пачалося перамір'е

Перамір'е паміж Ізраілем і ХАМАС, а таксама вызваленне закладнікаў набыло сілу і працягнецца 4 дні. Пагадненне, паводле якога будуць вызваленыя дзясяткі закладнікаў, якія ўтрымліваюцца баевікамі, і палестынцаў, якія сядзяць у турмах Ізраіля, было дасягнутае напярэдадні.

У гэты ж час у Газу будзе паступаць гуманітарная дапамога.

Забастоўка на ўкраінскай мяжы працягваецца

23 лістапада польскія дальнабойшчыкі заблакавалі апошні грузавы КПП на мяжы Польшчы і Украіны. Так пачалася трохдзённая папярэдняя акцыя пратэсту.

Заторы на пераходах расцягнуліся на дзясяткі кіламетраў, час чакання праезду на некаторых пунктах можа займаць пяць дзён. Арганізатары акцыі кажуць, што прапускаюць легкавыя аўтамабілі з пасажырамі, а таксама грузы гуманітарнай і вайсковай дапамогі.

Дальнабойшчыкі спрабуюць дамагчыся аднаўлення абавязковых дазволаў на ўезд у Еўрасаюз для ўкраінскіх грузавікоў. Гэтыя дазволы былі адмененыя пасля ўварвання Расіі ва Украіну, каб падтрымаць украінскую эканоміку. Адмена дзейнічае да чэрвеня 2024 года.

Транспартныя кампаніі краін, якія мяжуюць з Украінай, не могуць вытрымаць канкурэнцыі з больш таннымі перавозчыкамі з Украіны. Іх колькасць рэзка вырасла праз адсутнасць патрабаванняў аб дазволах. Да пратэстаў кіроўцаў з Польшчы далучыліся дальнабойшчыкі са Славакіі, а таксама польскія фермеры.

Паветра ў Еўрасаюзе прызналі недастаткова чыстым

Якасць паветра ў Еўропе паляпшаецца, але ўзровень яго забруджання застаецца завысокі. Пра гэта папярэджвае Еўрапейскае агенцтва па навакольным асяроддзі. Эколагі адзначаюць, што 27 краін-членаў ЕС не выконваюць уласныя стандарты чысціні атмасферы, не кажучы ўжо пра тыя, якія ўстанавіла Сусветная арганізацыя аховы здароўя. Ад гэтага еўрапейцы адчуваюць велізарны дыскамфорт і часта хварэюць. Вельмі шмат скаргаў на аўтамабільныя выхлапы.

У Іспаніі распрацавалі першую ШІ-мадэль

У Іспаніі распрацавалі першую віртуальную мадэль. Айтане 25 гадоў. Гэта жыццярадасная дзяўчына з Барселоны, знешнасць якой блізкая да дасканаласці. Па словах стваральніка, віртуальная мадэль можа зарабляць да 10 тысяч еўра ў месяц. У сярэднім жа яе штомесячны прыбытак складае каля 3 тысяч еўра.