Ці робяць беларуская мова на этыкетцы і спецыі расійскую каўбасу беларускай?

Пакуль беларусы спрачаюцца, ці неабходна, каб інфармацыя пра тавар на ўпакоўцы пісалася і па-руску, і — абавязкова — па-беларуску, у Расіі ўжо некалькі гадоў працуе вытворца, які пад брэндам “Беларускі смак” выпускае “сапраўдную беларускую каўбасу”. На мясакамбінаце непадалёк ад Масквы. Прычым назва брэнду напісаная менавіта так — па-беларуску. Значыць, мова на ўпакоўцы ўсё ж спрацоўвае?

“У нашай краіне існуе ўстойвае меркаванне, што беларускія прадукты смачныя і якасныя. Таму, правёўшы шэраг даследаванняў і адштурхоўваючыся ад неабходнасці распрацоўкі новай гандлёвай маркі, мы прынялі рашэнне: новая гандлёвая марка павінная быць у беларускім стылі, асноўным акцэнтам у нашых прадуктах павінная быць якасць, па-сапраўднаму беларускія прадукты павінныя быць па беларускіх рэцэптах”, — чытаю на сайце расійскага вытворцы “беларускіх каўбас”.

Назва па-беларуску, шмат беларускага арнаменту на этыкетцы — і справа ў прадпрымальнікаў пайшла. Вось толькі што ж гэта за беларускія рэцэпты каўбас? Чым беларускі рэцэпт, да прыкладу. “Кракаўскай” каўбасы адрозніваецца ад рэцэпту расійскага?

На сайце “Беларускага смаку” ўказаныя два кантактныя нумары: адзін расійскі, адзін — беларускі. Наяўнасць беларускага нумара здзіўляе: вырабляюцца каўбасы нібыта на Сергіева-Пасадскім мясакамбінаце і на 100% рэалізуюцца ў Расіі — навошта ім прадстаўнік у Беларусі? Новыя “беларускія рэцэпты” каўбас здабываць?

“Вырабляецца прадукцыя нашага брэнда на дзвюх пляцоўках — у Расіі і ў Беларусі ў тым ліку, а прадаецца ўся ў Расіі”, — тлумачыць Еўрарадыё кіраўнік аддзела маркетынгу Андрэй Дзядзюра.

Але казаць, на якой менавіта “беларускай пляцоўцы” і што канкрэтна вырабляе “Беларускі смак”, мой суразмоўца чамусьці адмаўляецца і просіць накіраваць ліст з пытаннямі. На пытанні пра таямнічыя “беларускія рэцэпты” каўбас Андрэй Дзядзюра адказвае вельмі цьмяна.

“Беларускія прадукты любяць за пэўныя іх характэрныя асаблівасці: смак, пэўны выгляд у кожнага прадукту ёсць — такія свае асаблівасці… І ўсё гэта можна назваць беларускімі традыцыямі і беларускімі рэцэптамі”, — кажа мне кіраўнік аддзела маркетынгу і ізноў кажа пра ліст на электронную пошту.

Праз некалькі гадзін атрымліваю адказ. І ведаеце, у чым сакрэт “беларускага рэцэпту” каўбас, якія вырабляе расійскі вытворца? У “наяўнасці траваў і спецый, якія традыцыйна выкарыстоўваюцца ў беларускай кухні”. Дык вось што робіць “Кракаўскую” каўбасу беларускай!

“Беларускай пляцоўкай” па вырабе аўтэнтычных каўбас ад “Беларускага смаку” аказваецца мясаперапрацоўчае прадпрыемства з Маладзечна “Велес-Міт”. Вось толькі на гэтым маладзечанскім прадпрыемстве нічога пра супрацоўніцтва з расійскім “Беларускім смакам” не ведаюць.

“Нешта пра іх чуў, але наўпрост ніколі з імі не сутыкаўся. Калі яны набываюць нашу прадукцыю, значыць, яны яе і прадаюць”, — нават губляецца ад майго пытання намеснік генеральнага дырэктара па камерцыі ААТ “Велес-Міт” Аляксандр Пятровіч.

Чакайце, але як можа расійскі “Беларускі смак” набываць прадукцыю беларускага “Велес-Міт”? Расіяне ж прадаюць прадукцыю пад сваім брэндам! Яны што, набываюць каўбасы ў маладзечанцаў, зрываюць іх этыкеткі і наклейваюць свае?

Ну і застаецца яшчэ адно пытанне: пра травы і спецыі, якія нібыта і робяць каўбасу беларускай паводле рэцэпту. Няўжо гэтага дастаткова, пытаюся ў спецыяліста па вытворчасці “Слуцкага мясакамбіната”, славутага сваімі слуцкімі каўбасамі.

“Я не ведаю, якую яны там каўбасу вырабляюць і ці можа гэта прэтэндаваць на званне чыста беларускай прадукцыі. Калі яны аргументуюць гэта толькі тым, што выкарыстоўваюць такія любімыя намі спецыі як кмен, каляндра ды іншыя, што выкарыстоўвае наш народ пры вырабе каўбас, то гэтага мала. Тыя смакавыя своеасаблівасці, якія даюць гэтыя спецыі, важныя, але больш нашу прадукцыю цэняць за тое, што там выкарыстоўваецца максімум мяса”, — кажа мая суразмоўца.

Па словах супрацоўніцы Слуцкага мясакамбіната, у Беларусі прытрымліваюцца жорсткіх патрабаванняў: чаго і колькі павінна быць ў складзе той ці іншай каўбасы. У Расіі ж патрабаванні гэтыя “лягчэйшыя”. І калі каўбасу рабіць паводле расійскіх стандартаў, але з беларускімі спецыямі, то сапраўды беларускай гэта яе не робіць.