Ціханоўская — пра памілаванне палітвязняў: "Гэта крокі ў правільным напрамку"
У Беларусі налічваецца больш за 1300 палітвязняў / Еўрарадыё
Кіраўніца Аб'яднанага пераходнага кабінета Беларусі Святлана Ціханоўская пракаментавала памілаванне ў РБ яшчэ 37 палітвязняў. Пра яго стала вядома ў панядзелак. Прозвішчы гэтых людзей не называюцца.
"Гэта крокі ў правільным напрамку, і вызваленні павінны працягвацца, — кажа Ціханоўская. — У той жа час праваабаронцы працягваюць атрымліваць інфармацыю пра новыя допыты, арышты, тэрміны і штрафы. З’яўляюцца новыя палітвязні. Рэжым кажа пра народнае адзінства, але пры гэтым падзяляе людзей на "сваіх" і "чужых" і працягвае біць "чужых", а часам і "сваіх" — каб іншыя баяліся".
Святлана Ціханоўская адзначае, што "рэжым спрабуе стварыць ілюзію, нібыта вызваляе "злачынцаў". "Але яны не ўчынялі ніякіх злачынстваў — толькі мелі смеласць мець свае перакананні, — кажа яна. — І пакуль хоць адзін чалавек застаецца за кратамі, мы працягнем рабіць усё, што магчыма, каб кожны выйшаў на волю і вярнуўся дадому".
У Беларусі за месяц памілавалі амаль сотню палітвязняў. Але за кратамі застаецца больш за 1300 палітычных зняволеных.
