Дэпрэсія праз расізм і рыба, падобная да Саўрана — #ІхНоравы

14/06/2024 - 14:42

Міжнародныя навіны / @rubanau_collage

Заўзець за сваю зборную, нават калі ты паліцэйскі і трэба быць нейтральным? Лёгка! У Германіі людзей у форме не сталі абмяжоўваць на час чэмпіянату Еўропы па футболе — спадзяёмся, яны не пачнуць помсціць за паразы сваёй зборнай!

Гэтая і іншыя цікавыя навіны — у нашым традыцыйным міжнародным аглядзе.

На Тайвані закрываюцца школы і ВНУ

Улады Тайваня асцерагаюцца эканамічнага крызісу, які насоўваецца праз старэнне насельніцтва. Як і ў іншых краінах Усходняй Азіі, тут спрабуюць дасягнуць "каэфіцыента ўзнаўлення", неабходнага для падтрымання стабільнага насельніцтва — 2,1 дзіцяці на адну жанчыну. Але на востраве гэты паказчык не дасягаўся з сярэдзіны 80-х гадоў.

Цяпер ён роўны ўсяго 0,865.

На Тайвані скарачэнне насельніцтва ўжо пачало ўплываць на прызыў у войска. А цяпер праблема распаўсюджваецца на школы і ВНУ. У перыяд з 2011 да 2021 года колькасць навучэнцаў пачатковых школ Тайваня ўпала з 2,3 млн да 1,8 млн.

СМІ паведамляюць, што 13 прыватным і прафесійным сярэднім школам пагражае закрыццё ўжо ў наступным годзе. А паводле статыстыкі Міністэрства адукацыі Тайваня, з 2014 года ў краіне закрыліся 15 каледжаў і ўніверсітэтаў, яшчэ чатыром ВНУ давядзецца закрыцца ў найбліжэйшы час.

Расізм выклікае дэпрэсію

Паводле даследавання, апублікаванага ў часопісе JAMA Network Open, расавая дыскрымінацыя павышае рызыку дэпрэсіі і трывогі.

"Мы ведаем, што дыскрымінацыйны досвед звязаны з шэрагам негатыўных наступстваў для здароўя", — кажуць аўтары даследавання.

Навукоўцы прааналізавалі апытанні, у якіх чарнаскурыя падлеткі расказвалі пра свой досвед расавай дыскрымінацыі. Калі ўдзельнік паказваў, што адчувае страх, трывогу, сум або дэпрэсію, даследчыкі адзначалі гэтыя пачуцці як унутраныя праблемы. А калі ён паведамляў, што часта сварыцца або ладзіць істэрыкі, такія паводзіны класіфікавалі як вонкавыя сімптомы.

Маладыя людзі, не схільныя адказваць на дыскрымінацыю і сварыцца з крыўдзіцелем, маюць вышэйшую рызыку адчуць сум або трывогу, чым тыя, хто "дае здачы".

Рыбу назвалі ў гонар ліхадзея з "Уладара пярсцёнкаў"

Новы від паку, выяўлены ў Амазонцы, быў названы ў гонар Саўрана з "Уладара пярсцёнкаў" — Myloplus Sauron. Акрамя незвычайнага жамчужна-белага колеру, у гэтай рыбы ёсць яркія аранжавыя і чорныя плямы, у тым ліку тоўстая вертыкальная чорная паласа, якая нагадала навукоўцам усёвідушчае вока Саўрана.

“Мы з суаўтарамі падумалі, што гэта добрая ідэя. Рыба і праўда падобная на вока Саўрана", — расказала суаўтарка даследавання Вікторыя Перэйра, аспірантка біялагічнага факультэта Універсітэта Паўліста ў Сан-Паўлу (Бразілія).

Myloplus Sauron — не адзіная жывёліна, названая ў гонар толкінаўскага ліхадзея. У гонар персанажа атрымалі імёны віды драўняных жаб і гнаявых жукоў і род дыназаўраў. Таксама летась яго імем назвалі новы від матылькоў.

У Германіі палісменам дазволілі заўзець. За сваю зборную

14 чэрвеня ў Германіі стартуе чэмпіянат Еўропы па футболе. Ахоўваць парадак на турніры будуць 54 тысячы паліцэйскіх. Згодна з дзейнымі правіламі, яны павінны быць нейтральнымі падчас нясення службы і не маюць права адкрыта святкаваць перамогу сваёй зборнай.

Іншае правіла забараняе палісменам насіць нацыянальны сцяг. Але кіраўнік МУС Нэнсі Фэзер адмяніла гэтыя нормы на час чэмпіянату. Цяпер на паліцэйскіх машынах можна размяшчаць чорна-чырвона-залаты сцяг, калі гэта не ўскладняе дарожны рух.

"Дазволена прымацоўваць нямецкія сцягі да машын федэральнай паліцыі падчас чэмпіянату Еўропы. Забарона з меркаванняў нейтралітэту прыпыненая. Вядома, федэральная паліцыя працягне выконваць свае задачы гэтак жа бесстаронне, нейтральна і высокапрафесійна", — сказала Фэзер у інтэрв'ю BILD.