Для гродзенскіх ветэранаў узнавілі атмасферу вайны (фота)
Каля 30 франтавікоў 7 траўня прынялі ўдзел у тэатралізаванай акцыі, прысвечанай Дню Перамогі.
Разам з пераапранутымі ў ваенную форму студэнтамі і школьнікамі вязні канцлагераў і работнікі тылу спявалі ваенныя песні і танцавалі пад музыку тых часоў.
Спецыяльная мультымедыйная прэзентацыя і тэатралізаванае прадстаўленне "Як пачыналася вайна" ўзнавілі хронікі і атмасферу вайны і Дня Перамогі. Гвардзейскія стужкі, бутэрброды з салам, фота Гродзеншчыны 1941-1944 гадоў, ваенныя экспанаты і касцюмы — усё нагадвала удзельнікам пра вайну і Дзень Перамогі.
Падчас свята гучалі аўдыёзапісы з фондаў гродзенскай бібліятэкі імя Карскага: галасы знакамітага дыктара Левітана, зварот маршала Жукава да Дня Перамогі.
Як распавёў кіраўнік праекта "Жывая гісторыя" Сяргей Іваноў, акцыя задуманая і для таго, каб паказаць моладзі, што значыць вайна.
