Эканаміст Кавалкін: заробкі выраслі, але наступны год — без пазітыву

24/12/2024 - 17:01

Уладзімір Кавалкін разважае пра беларускую эканоміку

Уладзімір Кавалкін разважае пра беларускую эканоміку / @rubanau_collage

Кіраўнік праекта “Кошт урада” эканаміст Уладзімір Кавалкін у эфіры Еўрарадыё расказаў, што адбывалася ў беларускай эканоміцы цягам 2024 года, падвёў асноўныя вынікі і паразважаў, што будзе ў годзе наступным.

Беларуская эканоміка паказала рост. Але ў наступным годзе такога не будзе

Уладзімір Кавалкін кажа, што, нягледзячы на рост беларускай эканомікі цягам года, у апошнім квартале яна пайшла на спад. Ён тлумачыць гэта тым, што эканоміка Беларусі цяпер вельмі перагрэтая.

— Бясконца расці нельга. Наступны год не будзе годам росту. Наступны год зробіцца годам паскарэння інфляцыі: яна не катастрафічна, але будзе разганяцца.

Кавалкін таксама адзначае, што з дэфіцытам працоўных рук рост эканомікі амаль немагчымы.

— Я не бачу пазітыву на наступны год.

Ці дзейнічаюць на Беларусь санкцыі?

На думку Кавалкіна, санкцыі працавалі, і гэта відаць з турбулентнасці экспарту і імпарту.

— Для звычайнага чалавека гэта як блакаванне сайтаў. Ты наведваеш сайт, а потым яго блакуюць. Потым ты знаходзіш люстэрка, а яго таксама блакуюць. Тое самае адбывалася і з імпартам-экспартам. То-бок Беларусь знаходзіла нейкія схемы — быў рост, а потым еўрапейцы і амерыканцы гэтыя схемы блакавалі, тады адбываўся спад. І так зноўку туды-сюды.

Кавалкін лічыць, што такое працягнецца, пакуль ідзе вайна.

— Калі пачнуцца перамовы, могуць прыпыніць уводзіць новыя санкцыі. Ну, і схемы пачнуць трошкі лепей працаваць. Калі не пачнуцца, будзе вось такое пусці-павалюся.

Пра даходы насельніцтва

За апошнія некалькі гадоў у Беларусі моцна павысіліся заробкі людзей, якія працуюць на абаронку. Эканаміст лічыць, што так будзе працягвацца, пакуль ёсць заказы.

— Напэўна, структура эканомікі будзе змяняцца ў бок таго, каб павялічваць ваенную вытворчасць настолькі, наколькі гэта магчыма. І эканоміцы, і Лукашэнку стратэгічна выгадная вайна.

Цяпер Беларусь ператвараецца ў аналаг позняга СССР. Калі скончыцца вайна, адразу будзе відаць, што гэтая прадукцыя нікому не патрэбная. І тыя, хто багацеў, — збяднеюць. Хтосьці на гэтым заробіць і пойдзе працаваць у іншы бок, а тыя, хто з локшынай на вушах, будуць чакаць, што зробіць сацыяльная дзяржава.

Ці багацелі беларусы?

Уладзімір Кавалкін адзначае, што даходы беларусаў за апошні год выраслі.

— Калі паглядзець на даваенныя паказчыкі, то цяпер даходы насельніцтва павялічыліся на 25% — за два гады гэта вельмі шмат.

Гэта адбываецца за кошт таго, што інфляцыю ў Беларусі стрымліваюць, і яна на нізкім узроўні, кажа эканаміст. Праз гэта адбываецца рост рэальных заробкаў і ВУП.

— Але гэта на паперы. Як яно насамрэч у канкрэтнага чалавека ці ў канкрэтнага прадпрыемства, невядома.