Эксперт пра сутыкненне BMW і картэжу: Гэта падобна на ДТЗ з Машэравым

Вядомы беларускі аўтаэксперт Аляксандр Канапліцкі па просьбе Еўрарадыё выказаў сваё меркаванне наконт прычыны гучнага ДТЗ пад вёскай Александрыя Шклоўскага раёна.

Нагадаем, што аварыя адбылася ўвечары 5 ліпеня. Здарэнне стала рэзанансным, бо, паводле непацверджанай інфармацыі, кіроўца BMW Ганна В. сутыкнулася з мікрааўтобусам з картэжу службы аховы прэзідэнта. Пацярпела пяць чалавек, двое ў цяжкім стане і перанеслі хірургічныя аперацыі.

Раім пачытаць: У BMW, якая пратараніла картэж, ехала двое маленькіх дзяцей

У дачыненні да 23-гадовай Ганны В. заведзеная крымінальная справа па артыкуле "Парушэнне ПДР, што пацягнула па неасцярожнасці прычыненне цяжкіх цялесных пашкоджанняў". Са словаў мужа падазраванай, яе ўзялі пад арышт проста ў бальнічнай палаце. А ў чацвер, 9 ліпеня, стала вядома, што следчыя не сталі змяшчаць дзяўчыну ў СІЗА.

"З самага пачатку відэа наперадзе мікрааўтобуса мы бачым як мінімум адну машыну. Гэта, хутчэй за ўсё, так званая сігнальная машына. Злева практычна ўсе сустрэчныя аўтамабілі спыніліся, — кажа Аляксандр Канапліцкі. — А BMW спачатку сыходзіць правей, на ўзбочыну. З гэтай прычыны з'яўляецца пыл. Калі машына рухаецца, напрыклад, з хуткасцю 70-80 км/г і рэзка выязджае на абочыну, яе пачынае цягнуць направа, таму што правыя колы запавольваюцца. Што інтуітыўна кіроўца робіць у такой сітуацыі? Правільна, рэзка круціць руль улева. На відэа бачна, як машына ідзе ўлева, а заднюю частку аўтамабіля заносіць управа. Магчыма, кіроўца BMW празявала дыстанцыю або машына спераду занадта рэзка спынілася. Але сутнасць у тым, што BMW выехала на сустрэчную, і гэта ў любым выпадку віна кіроўцы".

Еўрарадыё: Атрымліваецца, кіроўца праз няўважлівасць ці яшчэ з нейкіх прычын магла своечасова не скінуць хуткасць або не ацаніць правільна сітуацыю на дарозе...

Аляксандр Канапліцкі: Вось вы самі і адказалі на сваё пытанне. На відэа бачна, што ўсе сустрэчныя машыны, акрамя BMW, спыніліся. Гэта адбылося пасля таго, як кіроўцы, хутчэй за ўсё, убачылі першую сігнальную машыну.

Еўрарадыё: Ці магло паўплываць на ДТЗ магчымае перавышэнне хуткасці мікрааўтобуса з картэжу?

Аляксандр Канапліцкі: Не звяртайце ўвагі на хуткасць, з якой мог рухацца мікрааўтобус. Гэта не знаходзіцца ў прычыннай сувязі з ДТЗ. Мікрааўтобус едзе па сваёй паласе. Не ён выехаў на сустрэчную, а BMW. Прывяду прыклад. Калі чалавек праехаў на чырвонае святло і здзейсніў ДТЗ, то прычына ў тым, што ён праехаў на чырвонае святло, а не тое, што ў яго адсутнічала аптэчка або вогнетушыцель.

Да таго ж спецмашынам правіламі дазваляецца рухацца з перавышэннем хуткасці пры ўмове захавання бяспекі дарожнага руху. Нават калі мікрааўтобус і ехаў са значным перавышэннем хуткасці... Ну і што? Гэта магла б быць іншая спецмашына. Напрыклад, "хуткая", якая ехала б ратаваць чалавека. Або ратавальнікі, якія імчаліся б на пажар. Або міліцыя, якая спяшалася б на месца забойства...

Гэтая сітуацыя вельмі падобная на ДТЗ з Машэравым. У тым выпадку сігнальная машына праехала, сустрэчныя машыны спыніліся. А кіроўца грузавіка, які вёз бульбу, сапраўды гэтак жа, як тая BMW, выехаў на сустрэчную паласу. Сітуацыя адзін у адзін.