Футбольную зборную Польшчы ачоліў трэнер, які нарадзіўся ў Беларусі
Галоўным трэнерам футбольнай зборнай Польшчы стаў Чэслаў Міхневіч, які нарадзіўся ў Беларусі. Кантракт разлічаны да канца 2022 года, паведамляе pap.pl. Міхневічу 12 лютага споўніццца 52 гады. Ён — ураджэнец Бярозаўкі на Лідчыне. Яго маці прыехала з Польшчы ў госці да сваякоў у БССР і так здарылася, што нарадзіла сына да ад'езду.
Усю сваю кар'еру Чэслаў Міхневіч правёў у Польшчы — быў футбалістам, а ўжо два дзесяцігоддзі — трэнер. Апошнім яго клубам была варшаўская "Легія".
Пасада галоўнага трэнера зборнай Польшчы стала вакантнай пасля таго, як у канцы 2021-га ў адстаўку пайшоў партугалец Паўлу Соўза. Сярод кандыдатаў на замену быў украінец Андрэй Шаўчэнка.
