Сіноптыкі: Гэты тыдзень у Беларусі будзе цёплым
Цёплае надвор'е чакаецца ў Беларусі на гэтым тыдні. Пра гэта агенцтву БЕЛТА распавялі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Надвор'е будзе пераважна залежаць ад антыцыклону, які раскінуўся над поўначчу Еўропы. Дзякуючы яму на большай частцы тэрыторыі краіны захаваецца сонечнае, сухое і цёплае надвор'е. Толькі па поўдні Беларусі ёсць верагоднасць кароткачасовых дажджоў.
У аўторак, 8 траўня, будзе пераважна без ападкаў. Толькі зранку і ўдзень па паўднёвым усходзе краіны пройдуць невялікія кароткачасовыя дажджы з навальніцамі. Тэмпература паветра ўначы прагназуецца ад 8 да 14 градусаў цяпла, месцамі — +4...+7 градусаў. Удзень сіноптыкі прагназуюць 20-25 са знакам "плюс", па паўднёвым усходзе краіны — да 27 вышэй за нуль.
У сераду, 9 траўня, таксама ападкаў не чакаецца. Толькі зранку і ўдзень у асобных раёнах па поўдні Беларусі могуць прайсці кароткачасовыя дажджы, навальніцы. Тэмпература паветра ўначы і зранку будзе +6...+13 градусаў, у другой палове дня слупок тэрмометра падымецца да 20-26 са знакам "плюс".
У чацвер, 10 траўня, таксама кароткачасовыя дажджы з навальніцамі прагназуюцца ў асобных раёнах па крайнім паўднёвым захадзе Беларусі. Уначы тэмпература паветра будзе 8-14 цяпла, па паўночным усходзе — +5...+7 градусаў. Днём чакаецца ад 19 да 26 вышэй за нуль.
Пераважна без ападкаў будзе і ў пятніцу, 11 траўня. Толькі ў асобных раёнах па крайнім паўднёвым захадзе краіны магчымыя кароткачасовыя дажджы. Уначы слупок тэрмометра пакажа 5-12 градусаў вышэй за нуль, па паўночным усходзе — 3-4 градусы цяпла. Удзень будзе ад +17 па ўсходзе да +25 па паўднёвым захадзе.
