Ізраіль заклікае жыхароў Газы да эвакуацыі. ААН: гэта амаль немагчыма
Жыхары Газы / Getty Images
Армія Ізраіля заклікае жыхароў Газы пакінуць паўночныя раёны перад чаканай наземнай аперацыяй, якую плануюць у адказ на тэрарыстычны напад баевікоў ХАМАС. Раней ізраільскія ўлады давалі 24 гадзіны на эвакуацыю, цяпер тэрмінаў не называюць, але, як сказаў прадстаўнік арміі Рычард Хехт, “яны павінны пачаць рухацца”.
У сваю чаргу, ААН заклікае Ізраіль пераглядзець патрабаванне і даць як мінімум больш часу на эвакуацыю.
"Арганізацыя Аб'яднаных Нацый лічыць немагчымым, каб такое перамяшчэнне [1,1 млн чалавек з поўначы Газы] адбылося без разбуральных гуманітарных наступстваў”, — заявіў генсек арганізацыі Антоніу Гутэрыш.
Занепакоенасць выказвае і Сусветная арганізацыя аховы здароўя (СААЗ): там кажуць, што шмат пацыентаў з медустаноў немагчыма перавезці, асабліва ва ўмовах, калі ў Газе вялікія праблемы з электрычнасцю, палівам і вадой.
